BAKI, AzerVoice, Orxan Qədirzadə
Səudiyyə Ərəbistanı ABŞ-yə 1 trilyon dollarlıq investisiya yatıracaq.
AzerVoice xəbər verir ki, bu barədə ABŞ Prezidenti Donald Tramp ilə Səudiyyə Ərəbistanının Vəliəhd Şahzadəsi Məhəmməd bin Səlman arasında Ağ Evdə keçirilən görüşdən sonra məlumat verilib.
Məlumata görə, tərəflər ABŞ iqtisadiyyatına yönəldiləcək genişmiqyaslı sərmayə paketini müzakirə edib. Prezident Tramp Səudiyyə Ərəbistanının ilkin mərhələdə ABŞ-yə təxminən 600 milyard dollarlıq investisiya yatıracağını, dostluq və strateji tərəfdaşlıq münasibətləri fonunda bu məbləğin 1 trilyon dollara qədər arta biləcəyini bildirib.
Qeyd olunub ki, planlaşdırılan investisiyalar ABŞ-da yeni iş yerlərinin yaradılmasına, sənaye və infrastruktur layihələrinin genişləndirilməsinə, həmçinin iki ölkə arasında iqtisadi əməkdaşlığın daha da dərinləşməsinə xidmət edəcək.
Görüş zamanı, həmçinin enerji, müdafiə və regional təhlükəsizlik sahələrində əməkdaşlığın davam etdirilməsi məsələləri də müzakirə olunub.