BAKI, AzerVoice, Nərmin Ağayeva
İsrailin baş naziri Benyamin Netanyahu, Amerikalı sahibkar, YouTuber və podkast aparıcısı olan Patrick Bet-David-in podkastında çıxış edərək 1915-1917-ci illərdə Osmanlı İmperiyası tərəfindən ermənilərə qarşı törədilən qırğınları şəxsən soyqırım kimi tanıdığını elan edib.
AzerVoice xəbər verir ki, özü də etnik erməni olan Bet-David, Holokostun dünya miqyasında tanınması kontekstində İsrailin Erməni Soyqırımını niyə rəsmi olaraq tanımadığını soruşub.
Netanyahu, “Mən artıq tanıdım,” deyərək cavab verib, lakin bu bəyanatın İsrailin rəsmi siyasətini əks etdirmədiyi qeyd olunub. O, əvvəlcə Knessetin bu barədə qətnamə qəbul etdiyini iddia etsə də, belə bir qanun qəbul edilməyib.
Qeyd edək ki, İsrail uzun müddət Türkiyə ilə münasibətləri qorumaq üçün Erməni Soyqırımını rəsmi tanımamaq siyasəti yürüdüb. Lakin 2023-cü ilin oktyabrından bəri Türkiyə-İsrail münasibətlərinin pisləşməsi fonunda Netanyahu bu addımı atıb.