BAKI, AzerVoice

İsrail Hərbi Hava Qüvvələri Qəzza zolağının cənubunda yerləşən Xan Yunis bölgəsinə hava zərbələri endirib.

AzerVoice xəbər verir ki, bu barədə WAFA agentliyi məlumat yayıb.

Məlumata əsasən, hava hücumu nəticəsində azı 13 fələstinli ölüb, onlarla insan yaralanıb.

Raketlər həmçinin məcburi köçkünlərdən ibarət ailələrin sığındığı çadırı da hədəf alıb.

Xan-Yunisin, o cümlədən Batn əs-Samin bölgələrinin atəşə tutulmasında İsrailin pilotsuz uçuş aparatları (PUA) iştirak edib.

Xatırladaq ki, martın 18-də İsrail ordusu Qəzza zolağında döyüşləri bərpa edərək, ərazidəki genişmiqyaslı hərbi əməliyyatları genişləndirib və beləliklə, bu ilin yanvarında elan edilən atəşkəsi pozub. İsrail baş nazirinin ofisi bu əməliyyatın səbəbini, HƏMAS-ın ABŞ prezidentinin xüsusi nümayəndəsi Stiven Uitkoff tərəfindən irəli sürülən və vasitəçilər tərəfindən təklif olunan şərtləri qəbul etməməsi ilə əsaslandırıb. Bildirilib ki, əməliyyatın məqsədi bütün girovların azad edilməsidir. HƏMAS Qəzzadakı döyüşlərin yenidən başlamasında məsuliyyəti İsrail və ABŞ-a yükləyib.