BAKI, AzerVoice

Qəzzadakı ailələrin 90 faizindən çoxunun bazarda hələ də mövcud olan çox məhdud miqdarda ərzaq məhsullarını belə almağa imkanı yoxdur.

AzerVoice xəbər verir ki, bu barədə BMT-nin Humanitar Məsələlərin Əlaqələndirilməsi İdarəsi (OCHA) məlumat yayıb.

“Əhalinin qida rasionunda demək olar ki, ət, süd məhsulları, tərəvəz və meyvələr yoxdur, yumurta isə bazardan itib”. Bildirilir ki, ərzaq ehtiyatları azalmağa davam edir, çünki Qəzzaya yalnız kiçik partiyalarla yük maşınları buraxılır. Belə ki, bu həftə Qəzzaya gündəlik təxminən 250 min porsiya yemək daşınıb, halbuki aprel ayının sonunda gündəlik 1 milyondan çox porsiya paylanırdı. Bundan əlavə, ərzaq çatışmazlığı səbəbindən Qəzza zolağındakı ictimai yeməkxanaların yarısı fəaliyyətini dayandırmağa məcbur olub" - deyə, məlumatda qeyd olunub.

Qəzza hökumətinin hesablamalarına görə, əhalinin əsas tələbatlarını ödəmək üçün zolağa hər gün təxminən 500 yük maşını ilə humanitar yardım çatdırılmalıdır. Mayın 19-da İsrail hökuməti Qəzza zolağında aclıq təhlükəsinin qarşısını almaq üçün əsas ərzaq məhsullarının gətirilməsinə icazə verəcəyini açıqlayıb. 18 may tarixində isə İsrail ordusu genişmiqyaslı quru əməliyyatı çərçivəsində anklavın şimal və cənub bölgələrində döyüş əməliyyatlarının başladığını elan edib.

Beynəlxalq monitorinq təşəbbüsü olan “Ərzaq Təhlükəsizliyi üzrə İnteqrasiya edilmiş Faza Təsnifatı”nın (IPC) məlumatına görə, hazırda Qəzzada təxminən 1,95 milyon fələstinli ərzaq çatışmazlığı ilə üzləşir, onlardan 133 mindən çoxu isə aclıq çəkir. Hesabatda qeyd edilir ki, İsrailin hərbi əməliyyatlarını bütün anklav boyu genişləndirməsi və humanitar təşkilatların əhaliyə yardım çatdıra bilməməsi səbəbindən Qəzza sektorunda aclığın baş verməsi getdikcə daha da real görünür.