Bakı. AzerVoice:
Bizlər Bir yumruq, bir ürək, bir can şüarını rəhbər tutduq.
Bu barədə AzerVoice-ə, Türkiyəyə yardıma gedən Azərbaycan Könüllüsü Eltac Rəşidzadə deyib.
“Türkiyədə baş verən zəlzələdə könüllü kimi iştirak etmək həm çətin, həm də qürurverici bir fəaliyyət idi. Hər şeydən öncə Türkiyə bizim qardaş ölkəmizdir. Onların kədəri bizim kədərimiz, sevinci bizim sevincimizdir. Fəaliyyətlər içərisində əsasən biz, zəlzələdən zərər çəkən ailələr üçün çadırların qurulması, onlara qida, ərzaq, geyim və digər ləvazimatların paylanması yer alırdı. İlk dəfə getməyimizə və insanların bizi ilk dəfə görməsinə baxmayaraq hamımızı böyük sevinclə qarşılayırdılar. Biz də əlimizdən gələn köməyi ən yaxşı şəkildə onlara çatdırmağa çalışırdıq. 10-dan çox yardım tırının boşaldılması, yerləşdirilməsi və paylanmasını həyata keçirdik.” –deyə o bildirib edib.
Eltac Rəşidzadə qeyd edib ki, Türkiyənin bizim qardaşımız olduğunu unutmamalıyıq.
“Mən gəldiyim gündən etibarən bir çox fəaliyyətlərdə iştirak etsəm də, əsasən çadır heyətində idim. Kahramanmaraş Sütçü İmam Universitetində, dağ kəndlərində, Adıyaman, Malatya kimi vilayətlərdə bir çox çadır qurmuşuq. Bundan əlavə olaraq azyaşlı uşaqlara psixoloji dəstəyin göstərilməsi məqsədi ilə bir neçə çadır bağçalar da qurmuşuq. Artıq fəaliyyətimizin sonlarına yaxınlaşdıqca ayrılıq hissi bizi kədərləndirirdi. Çünki qısa müddət ərzində bölgədəki əhali ilə çox sıx bağlar qurmuşduq. Eyni hadisələrin yenə baş verməməsini ümid edirik. Amma qardaşımız yenə də çətinə düşərsə o zaman Azərbaycan Könüllüsü olaraq hər zaman hazır olacağıq” - deyə o bildirib.
Xatırladaq ki, fevralın 6-da Türkiyədə səhər saatlarında 7.7 və 7.6 bal gücündə iki zəlzələ baş verib. Dərinliyi 7 kilometr olduğu müəyyən edilən zəlzələ Hatay, Qaziantep, Kilis, Osmaniye, Malatya, Adıyaman, Şanlıurfa, Diyarbəkir, Adana və Kahramanmaraş vilayətlərində ciddi dağıntılara səbəb olub.
"Bir yumruq, bir ürək, bir can" şüarını rəhbər tutaraq qardaş ölkədə zəlzələ bölgələrində bu fəaliyyəti Azərbaycan Könüllüləri həm müddət, həm də say baxımından mütəşəkkil formada ölkəmizdən kənarda humanitar yardım istiqamətində təşkil olunmuş ilk könüllü fəaliyyəti kimi tarixə düşüb. Azərbaycanlı könüllülər zəlzələ bölgəsində çox çətin şəraitin olmasına, dağılmış ərazilərə yetişməyin çətinliklərinə baxmayaraq, uzun yol qət edərək, zəlzələdən zərərçəkənlərin köməyinə çatıb.
Hafiz Rufizoğlu
Xəbərlərimizi “WhatsApp” kanalımızdan oxuyun
