BAKI,VOA,Yusif Şərifzadə

İran rəhbərliyi ABŞ və İsrailin gələcəkdə ölkənin yüksək vəzifəli şəxslərinə qarşı hücumlarının qarşısını almaq məqsədilə cavab tədbirləri görəcəyini bəyan edib. Tehrandakı Tətbiqi Elm və Texnologiya Universitetinin professoru Mustafa Xoşçeşm bildirib ki, İran Vaşinqtona ağır itkilər verməklə çəkindirici təsir yaratmağa çalışır.

VOA xəbər verir ki, Mustafa Xoşçeşm iranlıların qisas alınmayacağı təqdirdə ABŞ və İsrailin ölkənin ali rəhbərliyinə qarşı hücumları davam etdirəcəyinə inandıqlarını deyib. Onun sözlərinə görə, Tehran bu təhlükənin qarşısını almaq üçün sərt cavab tədbirlərini zəruri hesab edir.

Professor xatırladıb ki, 2020-ci ildə ABŞ-nin pilotsuz uçuş aparatı ilə endirdiyi zərbə nəticəsində İranın yüksək rütbəli hərbi komandiri Qasım Süleymani öldürülüb. Bundan sonrakı dövrdə İranın bir sıra yüksək vəzifəli rəsmiləri də hücumların hədəfinə çevrilib.

Xoşçeşm bildirib ki, öldürülən şəxslər arasında İran Müdafiə Şurasının katibi və mərhum ali rəhbər Əli Xameneinin yaxın müşaviri Əli Şəmxani də olub. Onun fikrincə, bu hadisələr İran rəhbərliyində təhlükənin davamlı olduğu qənaətini gücləndirib.

Professor vurğulayıb ki, qarşılıqlı hücumlar dövrünün dayandırılması üçün İran ABŞ və İsrailə ciddi zərər vurmaqla çəkindirici mövqe formalaşdırmaq niyyətindədir. O hesab edir ki, yalnız bu halda gələcək sui-qəsd cəhdlərinin qarşısını almaq mümkün ola bilər.