BAKI,VOA,Yusif Şərifzadə

ABŞ ilə İran arasında imzalanmış çərçivə sazişindən sonra Hörmüz boğazında gəmiçilik fəaliyyəti tədricən bərpa olunsa da, dəniz marşrutunun tam təhlükəsiz hesab edilməsi üçün minatəmizləmə işlərinin başa çatdırılması əsas şərtlərdən biri sayılır.

VOA xəbər verir ki, mütəxəssislərin qiymətləndirməsinə əsasən, Hörmüz boğazında gəmi hərəkəti artsa da, fevralın 28-də başlayan müharibədən əvvəlki səviyyəyə çatması üçün müəyyən vaxt tələb olunacaq.

Məlumata görə, gəmiçilik şirkətləri və sığorta qurumları dəniz minaları təhlükəsinin davam etdiyini bildirərək boğazın hələ də yüksək risk daşıdığını vurğulayırlar.

İmzalanmış çərçivə sazişinə əsasən, İran boğazın yenidən tam istifadəyə verilməsi üçün 30 gün ərzində ərazidə mövcud olan dəniz minalarını təmizləməlidir.

Dəniz minaları müxtəlif növlərə bölünür. Onlar dənizin dibinə bərkidilə, suyun müəyyən dərinliyində saxlanıla və ya sərbəst şəkildə üzə bilərlər. Minalar gəminin təması, səs dalğaları, maqnit sahəsi və ya təzyiq dəyişiklikləri vasitəsilə işə düşə bilər.

Minatəmizləmə əməliyyatları xüsusi təyinatlı gəmilər, pilotsuz sualtı vasitələr, sonar sistemləri və peşəkar dalğıcların iştirakı ilə həyata keçirilir. Aşkar edilən minalar ya təhlükəsiz şəkildə zərərsizləşdirilir, ya da idarə olunan partlayış yolu ilə məhv edilir.