BAKI,VOA,Yusif Şərifzadə

Tehrandakı Strateji Araşdırmalar Mərkəzinin tədqiqatçısı Əli Əkbər Dareyni ABŞ-ni İranla imzalanmış anlaşma memorandumunun öhdəliklərini tam yerinə yetirməməkdə ittiham edib.

VOA xəbər verir ki, Əli Əkbər Dareyni bildirib ki, ABŞ ilə İran arasında imzalanmış anlaşma memorandumunda İrana məxsus dondurulmuş maliyyə vəsaitlərinin azad edilməsi üçün hər hansı əlavə şərt nəzərdə tutulmayıb.

Onun sözlərinə görə, ABŞ həmin vəsaitləri dərhal və heç bir şərt olmadan İrana qaytarmalı idi. Dareyni iddia edib ki, Vaşinqton bu öhdəliyini yerinə yetirməyib.

Tədqiqatçı qeyd edib ki, memorandum iki mərhələdən ibarətdir. Birinci mərhələ qarşılıqlı etimadın möhkəmləndirilməsinə, ikinci mərhələ isə yekun saziş üzrə danışıqlara həsr olunub.

Əli Əkbər Dareyni iddia edib ki, ABŞ memorandum üzrə üzərinə götürdüyü öhdəliklərə əməl etmədiyi üçün danışıqların davamı təhlükə altına düşə bilər.

O, həmçinin bildirib ki, memorandumun birinci maddəsində ABŞ-nin və İsrailin bütün cəbhələrdə hərbi əməliyyatların dayandırılması ilə bağlı öhdəliyi əks olunub. Dareyninin fikrincə, sonradan İsrail və Livan arasında ayrıca razılaşmanın əldə olunması memorandumun ruhuna ziddir.

Tədqiqatçı əlavə edib ki, ABŞ İrana məxsus maliyyə vəsaitlərini hələ də sərbəst buraxmayıb və bunu memorandumun icrası baxımından ciddi problem kimi qiymətləndirib.