BAKI,VOA Orxan Qədirzadə

İran NATO-nun Baş katibi Mark Ruttenin ABŞ-ın İrana qarşı hərbi əməliyyatlarına dəstək barədə səsləndirdiyi fikirlərə sərt reaksiya verib. Tehran alyansı ABŞ və İsrailin İrana qarşı apardığı müharibədə iştirakçılıqda ittiham edərək bunun beynəlxalq hüququn kobud şəkildə pozulması olduğunu bəyan edib.

Məsələ NATO rəhbərinin ABŞ Prezidenti Donald Tramp tərəfindən müttəfiqlərin müharibəyə kifayət qədər dəstək verməməsi ilə bağlı tənqidlərinə cavab olaraq verdiyi açıqlamalardan sonra gündəmə gəlib.

NATO-nun Baş katibi Mark Rutte ABŞ-ın “Epik Qəzəb” adlandırdığı hərbi əməliyyat zamanı bir çox müttəfiq ölkənin Vaşinqtona dəstək göstərdiyini bildirib.

Rutte ABŞ-ın “Fox News” televiziya kanalına müsahibəsində qeyd edib ki, bir çox NATO üzvü öz hərbi bazalarını ABŞ qüvvələrinin istifadəsinə təqdim edib.

“Bir ölkə ardınca digər ölkə, bir müttəfiq ardınca digər müttəfiq öz bazalarını ‘Epik Qəzəb’ əməliyyatı üçün istifadəyə verdi”, – deyə NATO rəhbəri bildirib.

Onun sözlərinə görə, ABŞ-a məxsus 500 hərbi təyyarə İtaliyadakı bazalardan havaya qalxaraq əməliyyatlara dəstək verib.

Rutte həmçinin bildirib ki, İranla müharibə dövründə Rumıniya hərbi məqsədlər üçün hava limanlarından istifadənin artırılması səbəbindən mülki aviasiya fəaliyyətini məhdudlaşdırıb.

Bu açıqlamalar Tehranın kəskin etirazına səbəb olub.

İran Xarici İşlər Nazirliyinin sözçüsü İsmayıl Beqai NATO rəhbərinin bəyanatlarını alyansın müharibədə fəal iştirakının etirafı kimi qiymətləndirib.

Baqaei sosial şəbəkədə paylaşdığı açıqlamada bildirib ki, NATO baş katibinin sözləri alyansın suveren BMT üzvü olan dövlətə qarşı qanunsuz hərbi təcavüzdə iştirak etdiyini açıq şəkildə təsdiqləyir.

İran rəsmisi NATO-nu beynəlxalq hüququn məcburi normalarını və BMT Nizamnaməsinin fundamental prinsiplərini kobud şəkildə pozmaqda ittiham edib.

Tehranın reaksiyasından sonra İtaliya hökuməti də məsələ ilə bağlı açıqlama verərək Mark Ruttenin sözlərindən uzaqlaşmağa çalışıb.

İtaliyanın Müdafiə Nazirliyi NATO rəhbərinin açıqlamalarının yanlış təəssürat yaratdığını və təsdiqlənmiş uçuşların xarakterini düzgün əks etdirmədiyini bildirib.

Nazirliyin yaydığı açıqlamada qeyd olunub ki, İtaliya yalnız ABŞ ilə qüvvədə olan razılaşmalar çərçivəsində texniki və logistik xarakterli uçuşlara icazə verib.

Rəsmi Roma vurğulayıb ki, söhbət birbaşa döyüş əməliyyatlarında iştirak edən uçuşlardan deyil, dəstək və təminat məqsədli fəaliyyətlərdən gedib.

Qeyd edək ki, ABŞ Prezidenti Donald Tramp NATO baş katibi Mark Rutte ilə keçirdiyi görüş zamanı alyansın bəzi üzvlərinin İrana qarşı müharibədə Vaşinqtona lazımi dəstəyi göstərməməsindən narazılığını ifadə etmişdi. Tramp müttəfiqlərin bir hissəsinin ABŞ-ın mövqeyini açıq şəkildə dəstəkləmədiyini bildirərək məyus olduğunu vurğulamışdı.

Son açıqlamalar fonunda NATO-nun Yaxın Şərqdəki hərbi əməliyyatlardakı rolu və alyans üzvlərinin ABŞ-a verdiyi dəstəyin miqyası ətrafında müzakirələr daha da intensivləşib.