BAKI,VOA, Fərid Mikayılov

İran Ordusunun Baş Komandanı general-mayor Əmir Hatəmi ölkənin Silahlı Qüvvələrinin ABŞ və İsrail tərəfindən tətbiq edilən 12 günlük müharibə və Ramazan müharibəsi zamanı düşməni ağır məğlubiyyətə uğratdığını bəyan edib.

VOA xəbər verir ki, Hatəmi bildirib ki, ordunun və İslam İnqilabı Keşikçiləri Korpusunun (SEPAH) quru və hərbi dəniz qüvvələri ölkəni düşmən təcavüzündən qorumaq üçün cənub sahillərində tam hazır vəziyyətdə yerləşdirilib.

O vurğulayıb ki, ABŞ və İsrailin İrana qarşı yönəlmiş təcavüzkar hərbi əməliyyatları zamanı düşmən İran sahillərinə yaxınlaşmağa belə cürət etməyib.

Çıxışında son dövrlərdə baş verən hərbi qarşıdurmalara və İrana qarşı yönələn təhdidlərə toxunan general-mayor, xüsusilə iki böyük hücum dalğasını (13 iyun 2025-ci il və 28 fevral 2026-cı il tarixlərində baş verən müharibələri) xatırladıb və Silahlı Qüvvələrin ölkəni özünün bütün güc və qüdrəti ilə müdafiə etdiyini diqqətə çatdırıb:

"Düşmən öz strateji hədəflərində İranı təslim etmək, İslam Respublikasının hərbi gücünü məhv etmək və hətta İranın xəritəsini dəyişdirmək istədiyini açıq şəkildə bəyan etmişdi. Lakin bu gün onların zərərli məqsədlərindən heç birinə nail olunmayıb."