BAKI,VOA, Fərid Mikayılov

İranın xarici işlər naziri danışıqlar prosesində ölkəsinin maraqlarının qorunmasının əsas prioritet olduğunu bəyan edib.

VOA xəbər verir ki, Abbas Əraqçi ABŞ və İsrail hücumları fonunda baş vermiş 40 günlük qarşıdurmadan sonra aparılan danışıqlarda İranın milli maraqlarının təmin olunmasının vacibliyini vurğulayıb.

İranlı nazir İslamabad şəhərində keçirilən görüşlərdən sonra Rusiya səfəri çərçivəsində Sankt-Peterburq şəhərinə yollanıb.

Əraqçi bildirib ki, İslamabaddakı görüşlər zamanı İran ilə ABŞ arasında danışıqların hansı şərtlər altında davam etdirilə biləcəyi müzakirə olunub. Onun sözlərinə görə, “40 günlük müqavimətdən sonra İran xalqının hüquqları mütləq təmin edilməli və ölkənin maraqları qorunmalıdır”.

Nazir qeyd edib ki, Rusiya səfərinin məqsədi Rusiya ilə regional və beynəlxalq məsələlər üzrə koordinasiyanı gücləndirməkdir. Bu çərçivədə onun Sergey Lavrov və Vladimir Putin ilə görüşü planlaşdırılır.

Oman səfərinə toxunan Əraqçi Oman ilə əməkdaşlığın əhəmiyyətini vurğulayıb. Bildirib ki, Hörmüz boğazı ətrafında təhlükəsizlik məsələləri qlobal əhəmiyyət daşıyır və bu istiqamətdə tərəflər arasında sıx məsləhətləşmələr aparılmalıdır.