BAKI,VOA
ABŞ Prezidenti Donald Tramp İslamabadda keçirilən yüksək səviyyəli görüşlərdən sonra İranın nüvə proqramı və Hörmüz boğazındakı fəaliyyəti ilə bağlı şok bəyanatlar verib. Prezident İranın dünyanı şantaj etdiyini bildirərək, ABŞ Hərbi Dəniz Qüvvələrinə boğazın tam blokadaya alınması və minaların təmizlənməsi barədə göstəriş verib.
Prezident Tramp İslamabad görüşü ilə bağlı vitse-prezident C.D. Vens, Stiv Vitkoff və Cared Kuşnerdən aldığı geniş brifinqdən sonra bildirib ki, danışıqlarda əksər bəndlər üzrə razılıq əldə olunsa da, ən mühüm məsələ olan nüvə faylı üzrə heç bir irəliləyiş olmayıb.
"İran öz nüvə ambisiyalarından əl çəkməyə hazır deyil. Əldə olunan razılaşmalar hərbi əməliyyatların davam etməsindən yaxşı olsa da, nüvə enerjisinin belə qeyri-sabit və mütəqallib insanların əlində olması ilə müqayisə edilə bilməz."-deyə Tramp bildirib.
Prezident Tehranın Hörmüz boğazını açmaq vədinə qəsdən əməl etmədiyini və bu vəziyyətin bir çox ölkədə narahatlıq yaratdığını vurğulayıb. Tramp İranın boğazdan keçən gəmilərdən rüsum tələb etməsini "beynəlxalq şantaj" adlandıraraq, ABŞ-ın cavab tədbirlərini açıqlayıb:
Hərbi blokada: "ABŞ Hərbi Dəniz Qüvvələri Hörmüz boğazına daxil olan və ya çıxan bütün gəmiləri blokadaya almağa başlayacaq. Bu prosesdə digər dövlətlər də iştirak edəcək."
Qanunsuz rüsumlara son: "Beynəlxalq sularda İrana rüsum ödəyən hər bir gəminin izlənilməsi və qarşısının alınması barədə göstəriş vermişəm. İrana qanunsuz ödəniş edən heç bir tərəfə açıq dənizdə təhlükəsiz keçid təmin olunmayacaq."
Trampın ən kəskin xəbərdarlığı isə boğazda basdırılmış minalarla bağlı olub. O, ABŞ ordusunun minaları məhv etməyə başlayacağını elan edib.
"İranlıların Hörmüz boğazına yerləşdirdiyi minaları təmizləməyə başlayırıq. Əməliyyat zamanı bizə atəş açan hər bir iranlı dərhal havaya uçurulacaq və cəhənnəmə göndəriləcək."-deyə ABŞ prezidenti qeyd edib.
Prezident həmçinin xatırladıb ki, İranın bir çox lideri, o cümlədən keçmiş Ali Rəhbər məhz bu nüvə ambisiyaları səbəbindən həyatını itirib. O, ABŞ-ın və digər dünya liderlərinin Tehranın şantajlarına heç vaxt boyun əyməyəcəyini qətiyyətlə vurğulayıb.