BAKI,VOA, Fərid Mikayılov

İranın ikinci ən böyük şəhəri olan Məşhəddə bütün qatar səfərləri qeyri-müəyyən müddətə təxirə salınıb.

VOA xəbər verir ki, Məşhəd valiliyinin qərarı ilə mərkəzi dəmir yolu vağzalından yola düşməli olan bütün reyslər dərhal dayandırılıb.

Bu addım İsrail hərbçilərinin İran mülki əhalisinə ünvanladığı xəbərdarlıqdan bir neçə saat sonra atılıb.

"Mehr" xəbər agentliyinin məlumatına görə, Məşhəd valisi dəmir yolu xidmətlərinin dayandırılmasını "ehtiyat tədbiri" kimi qiymətləndirib. Rəsmi açıqlamada bildirilir ki, şəhərin nəqliyyat qovşağında təhlükəsizlik riskləri nəzərə alınaraq, qatarların hərəkəti növbəti əmrə qədər bərpa olunmayacaq.

Hərəkətin dayandırılması İsrail Müdafiə Qüvvələrinin (IDF) sosial media vasitəsilə İran vətəndaşlarına etdiyi çağırışla birbaşa əlaqələndirilir. İsrail tərəfi fars dilində yaydığı bəyanatda iranlıları dəmir yolu infrastrukturundan uzaq durmağa çağırıb:

"Təhlükəsizliyiniz üçün bu andan etibarən İran vaxtı ilə saat 21:00-a qədər qatarlardan istifadə etməməyinizi və dəmir yolu xətlərindən uzaq durmağınızı xahiş edirik. Qatarlarda və relslərin yaxınlığında olmağınız həyatınız üçün təhlükə yaradır".