BAKI,VOA, Nailə Babazadə

İranın xarici işlər naziri Abbas Əraqçi ABŞ və İsrailin Fars körfəzi sahilində yerləşən Buşehr Nüvə Enerji Stansiyasına endirdiyi zərbələrlə bağlı kəskin xəbərdarlıq edib.

VOA xəbər verir ki, nazir sosial media hesabından paylaşdığı mesajda beynəlxalq birliyin bu hücumlar qarşısındakı səssizliyini tənqid edib.

Əraqçi Qərb dövlətlərinin Ukraynadakı Zaporojye nüvə stansiyası ətrafındakı döyüşlərə göstərdiyi kəskin reaksiyanı xatırladaraq, Buşehr stansiyasının artıq dördüncü dəfə bombalandığını vurğulayıb. O bildirib ki, stansiyada baş verə biləcək hər hansı radioaktiv sızıntı və ya serpinti təkcə İranı deyil, Körfəz Əməkdaşlıq Şurasına üzv olan qonşu ərəb ölkələrinin paytaxtlarındakı həyatı tamamilə iflic edə və sonlandıra bilər.

İranlı nazir həmçinin neft-kimya sektoruna qarşı həyata keçirilən hücumların bu hərbi əməliyyatların əsl məqsədini – ölkənin iqtisadi və sənaye sütunlarını məhv etmək niyyətini aydın şəkildə ortaya qoyduğunu qeyd edib. O, regional fəlakətin qarşısını almaq üçün beynəlxalq mexanizmlərin dərhal hərəkətə keçməsinin vacibliyini diqqətə çatdırıb.