Bakı, VOA, Nailə Babazadə

İranın İsrailə qarşı həyata keçirdiyi iki ardıcıl qisas əməliyyatı nəticəsində raket qalıqlarının paytaxt Təl-Əvivə düşməsi ilə 14 nəfər xəsarət alıb.

VOA xəbər verir ki, İsrailin "Qırmızı Davud Ulduzu" təcili yardım xidmətinin verdiyi məlumata görə, ilkin müdaxilə zamanı yaralılardan birinin vəziyyətinin ağır, ikisinin orta ağır, 11 nəfərin isə yüngül olduğu müəyyən edilib. Şrapnel yaraları alan şəxslər dərhal yaxınlıqdakı xəstəxanalara təxliyə olunublar.

İran səhər saatlarında İsrailin hərbi və strateji obyektlərini hədəf alaraq genişmiqyaslı raket hücumları həyata keçirib. Misillemə zərbələrindən sonra Təl-Əviv başda olmaqla, ölkənin mərkəzi hissəsindəki bir çox şəhərdə həyəcan siqnalları çalınıb və müdafiə sistemləri tərəfindən vurulan raketlərin parçaları yaşayış məntəqələrinə səpələnib. İsrailin hava hücumundan müdafiə qüvvələri əhalini sığınacaqlardan çıxmamağa və rəsmi xəbərdarlıqlara əməl etməyə çağırıb.

Eyni zamanda, İsrailin "Kanal 12" televiziyası İranın hücumları ilə paralel olaraq Livanın cənubundan "Hizbullah"ın da İsrailin şimal bölgələrini hədəf aldığını xəbər verib. Koordinasiyalı şəkildə həyata keçirilən bu əməliyyatlar nəticəsində ölkənin şimalında da intensiv həyəcan siqnalları eşidilib. Hazırda İsrail ordusu hər iki cəbhədən gələn təhdidləri dəf etmək üçün tam döyüş hazırlığı vəziyyətinə gətirilib və dəymiş ziyanın miqyası dəqiqləşdirilir.