BAKI,VOA, Nailə Babazadə

İran İslam Respublikası Beynəlxalq Atom Enerjisi Agentliyinin (MAQATE) baş direktoru Rafael Qrossini kəskin tənqid edərək, onu ABŞ və İsrailin İranın nüvə obyektlərinə təşkil etdiyi hücumlara qarşı səssiz qalmaqda ittiham edib.

VOA xəbər verir ki, İran xarici işlər nazirinin müavini Kazım Qəribabadi "X" sosial şəbəkəsində paylaşdığı bəyanatda Qrossinin son açıqlamalarını "dağıdıcı" adlandırıb. Qrossinin "Nüvə müharibəsi olmadığı müddətcə heç bir döyüş İranın nüvə potensialını yox edə bilməz" sözlərinə reaksiya verən Qəribabadi yazıb:

"O, beynəlxalq təşkilatın baş direktorudur, yoxsa media analitiki? İranın qoruma altındakı nüvə proqramına qarşı qanunsuz hücumlar barədə xəbərdarlıq etmək əvəzinə, o, bu obyektləri məhv etməyin yollarını göstərir."

Qəribabadi xüsusilə Buşehr nüvə stansiyasına və digər obyektlərə edilən son hücumların MAQATE tərəfindən hələ də pislənilmədiyinə diqqət çəkib. O, Agentlik rəhbərinin bu mövqeyinin "tərəfli və passiv" olduğunu bildirərək, MAQATE-ni öz nizamnaməsinə uyğun olaraq nüvə obyektlərinin toxunulmazlığını müdafiə etməyə çağırıb.

Qeyd edək ki, Rafael Qrossi Amerikanın CBS telekanalına müsahibəsində İranın nüvə potensialının hərbi yolla tamamilə sıradan çıxarılmasının qeyri-mümkün olduğunu, lakin hazırkı münaqişənin ciddi radiasiya riskləri yaratdığını vurğulamışdı.