BAKI,VOA, Nailə Babazadə

İran İsrailin cənubunda yerləşən Arad və Dimona şəhərlərini hədəf alan yeni cavab zərbələri həyata keçirib.

VOA xəbər verir ki, İsrail ordusundan edilən yazılı açıqlamada İrandan atıldığı müəyyən edilən raketlərin qarşısının alınması üçün hava hücumundan müdafiə sistemlərinin işə düşdüyü bildirilib. Hücum təhlükəsi altında olan bölgələrdə mobil telefonlara xəbərdarlıq mesajları göndərilib və əhalidən növbəti bildirişə qədər sığınacaqlarda qalmaları istənilib.

"Yedioth" qəzetinin xəbərinə görə, İsrailin cənubundakı Dimona, Arad və Negev (Necef) səhrası bölgəsində həyəcan siqnalları çalınıb. İsrailin cənubunu hədəf alan raketlərin hava hücumundan müdafiə sistemləri tərəfindən zərərsizləşdirildiyi barədə məlumatlar mediada yer alıb.

İsrailin təcili yardım xidməti "Qırmızı Davud Ulduzu"ndan (Magen David Adom) verilən açıqlamada, ilkin məlumatlara görə hücum nəticəsində həlak olan və ya yaralananların olmadığı qeyd edilib.

Xatırladaq ki, İranın 21 mart tarixində İsrailin cənubuna təşkil etdiyi hücumlar zamanı Arad və Dimona şəhərlərinə birbaşa raket zərbələri endirilmişdi. Həmin vaxt Aradda 84, Dimonada isə onlarla insanın yaralandığı bildirilmişdi. İsrail ordusu Arad və Dimonanı vuran iki İran raketinin "bir-birindən asılı olmayan texniki xətalar" səbəbindən zərərsizləşdirilə bilmədiyini iddia etmişdi.