Bakı, AzerVoice, Nailə Babazadə
1922-ci il dekabrın 30-da inqilabdan sonrakı Rusiyada Sovet Sosialist Respublikaları İttifaqı (SSRİ) yaradıldı. Yeni dövlət Rusiyanın, Belarusiyanın, Ukraynanın və Zaqafqaziya Federasiyasının (1936-cı ildə Gürcüstan, Azərbaycan və Ermənistan respublikalarına bölünüb) konfederasiyası əsasında formalaşdı. Sovet İttifaqı kimi tanınan bu kommunist dövlət Rusiya imperiyasının varisi və dünyada marksist sosializm ideologiyası üzərində qurulan ilk ölkə oldu.
1917-ci il Rusiya İnqilabı və onu izləyən üçillik vətəndaş müharibəsi dövründə Vladimir Leninin rəhbərlik etdiyi bolşeviklər fəhlə və əsgər sovetlərindən ibarət qüvvələrə nəzarəti ələ keçirdilər. Bu qüvvələr keçmiş Rusiya imperiyası ərazisində sosialist dövlətin qurulmasını tələb edirdi. SSRİ-də hakimiyyətin bütün pillələri Kommunist Partiyasının nəzarətində idi. Partiyanın Politbürosu və xüsusilə getdikcə daha çox səlahiyyət toplayan baş katib faktiki olaraq ölkəni idarə edirdi.
Sovet İttifaqında sənaye müəssisələri dövlət mülkiyyətinə keçirildi, kənd təsərrüfatı torpaqları isə dövlət tərəfindən idarə olunan kollektiv təsərrüfatlara bölündü. Zaman keçdikcə Rusiyanın dominant rol oynadığı SSRİ dünyanın ən güclü və təsirli dövlətlərindən birinə çevrildi və tərkibinə 15 respublika daxil oldu: Rusiya, Ukrayna, Gürcüstan, Belarus, Özbəkistan, Ermənistan, Azərbaycan, Qazaxıstan, Qırğızıstan, Moldova, Türkmənistan, Tacikistan, Latviya, Litva və Estoniya.
1991-ci ildə kommunist hakimiyyətin süqutundan sonra Sovet Sosialist Respublikaları İttifaqı rəsmi olaraq dağıldı.