BAKI,VOA, Orxan Qədirzadə

Tunisli rejissor Kauzer Ben Hanianın Qəzzada həlak olan 5 yaşlı Hind Rəcəbin son anlarından bəhs edən "The Voice of Hind Rajab" (Hind Rəcəbin Səsi) filmi beynəlxalq aləmdə böyük əks-səda doğurub.

82-ci Venesiya Beynəlxalq Film Festivalında dünya premyerası keçirilən ekran əsəri festival tarixinin ən uzunmüddətli – tam 23 dəqiqəlik ayaqüstü alqışına səhnə olub. Bununla da film, 2006-cı ildə Kannda "Panın Labirinti" filminə məxsus olan 22 dəqiqəlik rekordu geridə qoyub.

Orijinal səs yazıları üzərində qurulan əsər

Film 29 yanvar 2024-cü ildə İsrail ordusunun hücumu zamanı ailə üzvləri ilə birlikdə avtomobildə hədəf alınan Hind Rəcəbin real hekayəsinə əsaslanır. Avtomobil 300-dən çox güllə ilə atəşə tutularkən ailənin 5 üzvü yerindəcə həlak olub. 5 yaşlı Hind isə sağ qalaraq təxminən üç saat ərzində Fələstin Qızıl Aypara Cəmiyyətinin könüllüləri ilə telefon əlaqəsində olub və yardım istəyib.

Rejissor Ben Hania filmdə həmin dəhşətli anların orijinal səs yazılarını istifadə edib. Ekran işində zorakılıq səhnələri nümayiş etdirilməsə də, balaca qızın "Çox qorxuram, nə olar gəlib məni götürün" yalvarışları tamaşaçılara sarsıdıcı təsir bağışlayır.

Layihə beynəlxalq kino ictimaiyyətinin ən nüfuzlu simaları tərəfindən dəstəklənib. Bred Pitt, Xoakin Feniks, Runi Mara, Alfonso Kuaron və Conatan Qleyzer kimi ulduzlar filmin icraçı prodüserləri qismində çıxış ediblər. Venesiyadakı nümayiş zamanı aktyorlar səhnəyə Hindin fotoşəklini çıxarıb, zalda isə "Azad Fələstin" şüarları səsləndirilib.

Filmin aktrisası Saja Kilani mətbuat konfransında Hindin səsinin son iki ildə öldürülən on minlərlə uşağın səsi olduğunu vurğulayıb.