BAKI, AzerVoice

HƏMAS həm İsrail, həm də ABŞ vətəndaşlığına malik olan İden Aleksandr adlı girovun azad ediləcəyini təsdiqləyib.

AzerVoice xəbər verir ki, bu barədə HƏMAS-ın Telegram kanalında yayımlanan açıqlamada bildirilib.

Açıqlamada qeyd olunub ki, HƏMAS son bir neçə gün ərzində ABŞ administrasiyası ilə danışıqlar aparıb və bu məsləhətləşmələrin nəticəsi olaraq, müsbət niyyət nümayiş etdirmək məqsədilə İden Aleksandrın azad olunmasına qərar verilib.

HƏMAS eyni zamanda bəyan edib ki, bu addım Qəzza zolağında atəşkəsə yönəlik səylərin bir hissəsi kimi qiymətləndirilməlidir. Bu çərçivədə hərəkat, Qəzzanın İsraillə sərhədində yerləşən bütün keçid məntəqələrinin açılmasını və humanitar yardımın zolağa daxil olmasına icazə verilməsini tələb edir.

Girovun azad ediləcəyi konkret tarix açıqlanmasa da, HƏMAS qeyd edib ki, Qəzzadakı vəziyyətlə bağlı intensiv danışıqlara dərhal başlamağa hazırdır və döyüşlərin dayandırılması ilə yanaşı, israilli girovların fələstinli məhbuslarla dəyişdirilməsi istiqamətində ciddi səylər göstərməyə qərarlıdır.

Xatırladaq ki, 15 aprel tarixində HƏMAS, İden Aleksandrın saxlanıldığı yerin İsrail tərəfindən bombalandığını və onu qoruyan döyüşçülərlə əlaqənin kəsildiyini açıqlamışdı. Həmin vaxtdan etibarən onun vəziyyəti ilə bağlı heç bir rəsmi məlumat verilməmişdi. 29 aprel tarixində isə HƏMAS-a yaxınlığı ilə tanınan Maan agentliyi xəbər vermişdi ki, Qəzzaya dair dolayı danışıqlarda İden Aleksandr da daxil olmaqla israilli girovların may ayı ərzində azad edilməsinə dair razılıq əldə olunub.