BAKI,VOA Orxan Qədirzadə

Türkiyədə 2026-cı ilin birinci rübünə dair əmək bazarı göstəriciləri açıqlanıb. Mövsüm təsirləri nəzərə alınmadan hesablanan göstəricilərə əsasən işsizlik səviyyəsində azalma qeydə alınsa da, qeyri-fəal əmək ehtiyatı göstəricisinin artması diqqət çəkib. Xidmət sektoru məşğulluqda ən böyük paya sahib olaraq qalarkən, ümumi məşğulluq və işçi qüvvəsində azalma müşahidə olunub.

VOA xəbər verir ki, Türkiyə Statistika Qurumunun açıqladığı “Əmək Bazarı Statistikası – 2026-cı ilin birinci rübü” hesabatına əsasən, 15 və daha yuxarı yaş qrupunda işsizlərin sayı əvvəlki rüblə müqayisədə 52 min nəfər azalaraq 2 milyon 894 min nəfər olub. Bununla da mövsüm təsirləri nəzərə alınmadan hesablanan göstəricilərə görə işsizlik səviyyəsi 0,1 faiz bəndi azalaraq 8,2 faiz təşkil edib.

Məlumatlara görə, kişilər arasında işsizlik səviyyəsi 6,8 faiz, qadınlar arasında isə 11,1 faiz olub. Beləliklə, qadın işsizliyinin kişilərlə müqayisədə yüksək qalması davam edib.

Məşğul əhalinin sayı azalıb

2026-cı ilin ilk rübündə məşğul əhalinin sayı əvvəlki rüblə müqayisədə 301 min nəfər azalaraq 32 milyon 221 min nəfərə enib. Məşğulluq səviyyəsi isə 0,5 faiz bəndi azalaraq 48,3 faiz olub.

Cins bölgüsünə əsasən kişilər arasında məşğulluq səviyyəsi 65,7 faiz təşkil etdiyi halda, qadınlarda bu göstərici 31,3 faiz səviyyəsində qalıb.

İşçi qüvvəsində iştirak göstəricisində də azalma qeydə alınıb. İşçi qüvvəsinin ümumi sayı əvvəlki rüblə müqayisədə 353 min nəfər azalaraq 35 milyon 116 min nəfər təşkil edib. İşçi qüvvəsində iştirak səviyyəsi isə 0,7 faiz bəndi azalaraq 52,6 faizə düşüb.

Kişilər arasında əmək bazarında iştirak səviyyəsi 70,5 faiz, qadınlarda isə 35,2 faiz olub.

Gənclər arasında işsizlik dəyişməyib

15–24 yaş aralığını əhatə edən gənclər arasında işsizlik səviyyəsi əvvəlki rüblə müqayisədə dəyişməyərək 15,2 faiz səviyyəsində qalıb.

Bu yaş qrupunda kişilər arasında işsizlik 12,6 faiz, qadınlar arasında isə 20,4 faiz təşkil edib. Beləliklə, gənc qadın işsizliyinin yüksək səviyyədə qalması davam edib.

Xidmət sektoru ilk yerdədir

Mövsüm təsirləri nəzərə alınmadan hesablanan göstəricilərə, görə məşğul əhalinin 59,3 faizi xidmət sektorunda çalışır. Kənd təsərrüfatı sektorunun məşğulluqdakı payı 13,8 faiz, sənaye sektorunun payı 20,2 faiz, tikinti sektorunun payı isə 6,7 faiz olub.

Rüblük müqayisədə kənd təsərrüfatında çalışanların sayı 44 min nəfər, sənayedə 20 min nəfər, tikintidə 48 min nəfər, xidmət sektorunda isə 189 min nəfər azalıb.

Həftəlik iş saatı azalıb

Mövsüm təsirləri nəzərə alınmadan hesablanan göstəricilərə görə orta həftəlik faktiki iş vaxtı da azalma göstərib. Hesabat dövründə çalışan şəxslərin həftəlik orta iş müddəti 0,3 saat azalaraq 42,2 saat təşkil edib.

Qeyri-fəal əmək ehtiyatı göstəricisi 30,4 faizə yüksəlib

Əmək bazarında ən diqqətçəkən göstəricilərdən biri qeyri-fəal əmək ehtiyatının artması olub.

Vaxtla bağlı natamam məşğulluq, potensial işçi qüvvəsi və işsizlərin cəmini əhatə edən qeyri-fəal əmək ehtiyatı göstəricisi 2026-cı ilin birinci rübündə əvvəlki rüblə müqayisədə 0,6 faiz bəndi artaraq 30,4 faizə çatıb.

Vaxtla bağlı natamam məşğulluq və işsizlərin birgə göstəricisi 19,8 faiz, potensial işçi qüvvəsi ilə işsizlərin ümumi göstəricisi isə 20,4 faiz olaraq hesablanıb.

İqtisadçılar hesab edirlər ki, işsizlik səviyyəsindəki məhdud azalmaya baxmayaraq, qeyri-fəal əmək ehtiyatı göstəricisinin yüksəlməsi əmək bazarında struktur problemlərinin davam etdiyini göstərir.

Türkiyə Statistika Qurumu əmək bazarı statistikaları üzrə növbəti hesabatın 2026-cı il avqustun 19-da açıqlanacağını bildirib.