BAKI, AzerVoice

BƏƏ-nin Emirates Hava Yolları 13 illik fasilədən sonra iyulun 16-da Dəməşq reyslərini bərpa edəcək.

AzerVoice xəbər verir ki, 2012-ci ildə Suriyadakı vətəndaş müharibəsi səbəbilə dayandırılmış uçuşlar ilkin mərhələdə həftədə üç dəfə – bazar ertəsi, çərşənbə və bazar günləri həyata keçiriləcək.

2 avqustdan etibarən şənbə günü də əlavə olunacaq və həftəlik reyslərin sayı dördə çatacaq. Oktyabrın 26-dan isə uçuşlar gündəlik icra olunacaq.

Emirates-in bu qərarı BƏƏ Baş Mülki Aviasiya İdarəsi ilə aparılan ətraflı qiymətləndirmədən sonra qəbul edilib. Şirkətin İdarə Heyətinin sədri Şeyx Əhməd bin Səid Əl Məktum bildirib ki, bu addım Suriyanın bərpa və yenidənqurma səylərinə strateji dəstək verəcək, iqtisadi fəallığı canlandıracaq, sərmayə və ticarətə yeni imkanlar yaradacaq.

O, həmçinin qeyd edib ki, yeni hava əlaqələri Amerikada, Avropada və Körfəz ölkələrində yaşayan suriyalıların vətənləri ilə əlaqəsini gücləndirəcək. Bu insanlar öz bilik və bacarıqları ilə ölkənin inkişafına töhfə verə bilərlər.

Qeyd edək ki, Emirates Hava Yolları 2012-ci ildə Suriyada vətəndaş qarşıdurması şiddətlənəndən sonra Dəməşq uçuşlarını dayandırmışdı. Hazırda BƏƏ-də 350 mindən çox suriyalının yaşadığı bildirilir və bu qərarın iki ölkə arasında ticarət əlaqələrinin dirçəlməsinə təkan verəcəyi gözlənilir.