BAKI,VOA, Orxan Qədirzadə
ABŞ Prezidenti Donald Trampın İrana qarşı müəyyən etdiyi müddətin başa çatmasına saatlar qalmış, Vaşinqtonun hədəf seçə biləcəyi strateji infrastruktur obyektlərinin xəritəsi məlum olub.
ABŞ-ın hədəf siyahısında ənənəvi hərbi obyektlərlə yanaşı, ölkənin enerji və nəqliyyat sisteminin onurğa sütununu təşkil edən mülki infrastrukturun da yer alacağı gözlənilir. Bu hədəflər arasında elektrik stansiyaları və strateji körpülər xüsusi çəkiyə malikdir. Bu obyektlərin sıradan çıxarılması milyonlarla iranlının gündəlik həyatını iflic etmək və dövlətin iqtisadi dayaqlarını sarsıtmaq məqsədi daşıyır.
Enerji sektoru: Elektrik stansiyaları
İranın elektrik şəbəkəsi iri şəhərlərin və sənaye zonalarının qidalandırılmasında həlledici rol oynayan bir neçə nəhəng stansiyadan asılıdır:
Dəmavənd stansiyası - Tehranın şərqində yerləşən bu obyekt ölkənin ən böyük elektrik stansiyalarından biridir və paytaxtın əsas enerji mənbəyidir.
Şəhid Rəcai stansiyası - Qəzvin vilayətində yerləşən bu stansiya ölkənin mərkəzini qərb regionları ilə birləşdirən enerji qovşağıdır.
Neka stansiyası - Mazandaran vilayətində, Xəzər dənizi sahilində yerləşən bu müəssisə şimal bölgələrinin enerji sabitliyini təmin edir.
Buşəhr Atom Elektrik Stansiyası - Ölkənin cənubunda yerləşən yeganə nüvə enerji obyekti olması səbəbindən həm strateji, həm də geosiyasi baxımdan ən həssas hədəf hesab olunur.
Nəqliyyat sektoru: Strateji körpülər
İkinci əsas hədəf qrupu ölkə daxilində yük və insan daşımalarını təmin edən nəqliyyat qovşaqlarıdır.
Tehran-Kərəc bağlantısı Paytaxtı şimal-qərb bölgələri ilə birləşdirən körpülər ticarət dövriyyəsinin əsas arteriyasıdır.
Şimal dəhlizi: Paytaxtı Xəzər sahili ilə birləşdirən dağlıq keçidlərdəki körpülər strateji təchizat zəncirinin bir hissəsidir.
Qərb və cənub yolları - Sənaye zonalarına və sərhəd bölgələrinə gedən magistrallardakı körpülər iqtisadiyyatın fəaliyyəti üçün kritik əhəmiyyət kəsb edir.
Ekspertlərin fikrincə, bu infrastrukturun hədəf alınması təkcə enerji kəsintilərinə deyil, həm də su təchizatı, rabitə və sənaye istehsalının tamamilə dayanmasına səbəb ola bilər.