Bakı, AzerVoice
Almaniyanın Ebersvalde şəhərində törədilən yanğında iki türkün ölməsindən sonra Almaniyada türklərə və müsəlmanlara qarşı hücumlar yenidən gündəmə gəlib.
2024-cü il Almaniyada irqçi hücumların və ifrat sağçı zorakılığın sürətlə artdığı bir il olaraq tarixə düşüb. Baş verən son hadisələr ölkədə müsəlman və türk icmalarının üzləşdiyi ayrı-seçkilik və zorakılıq təhlükəsini də ortaya qoyur.
Sentyabrın 14-də gecə saatlarında Eberswalde şəhərində Emine Çoban və oğlu Umut Can Çobanın həyatını itirdiyi yanğınla bağlı qəsdən yandırma şübhəsi ilə başladılan istintaq bu hücumların miqyasını bir daha ortaya qoydu.
Prokurorluq yanğının qəsdən törədildiyinə dair güclü şübhələrin olduğunu deyib.
Bundan öncə də türklərin yaşadığı evlər yandırılmışdı.
Almaniyanın Solingen şəhərində mart ayında baş verən yanğında türk əsilli bolqar ailənin 4 üzvü həyatını itirmişdi.
May ayında Düsseldorf şəhərində bir binada baş verən və 18 yaşlı türk yeniyetmə Ada Abayın da daxil olduğu 3 nəfərin həyatını itirdiyi, 16 nəfərin yaralandığı yanğının da qəsdən törədildiyi ortaya çıxmışdı.
Sentyabrın 16-da Kölndə türk əyləncə məkanının yerləşdiyi binada baş verən partlayış, türklərə olan təhdidləri bir daha göstərdi. Təhlükəsizlik kamerasının görüntülərinə əsasən, hadisənin öncədən binaya qoyulan qutunun partlaması nəticəsində baş verdiyi məlum olub.
Türkləri hədəf alan oxşar hücumlar 2008-ci ildə Almaniyanın cənubunda və 2020-ci ildə Hanau bölgəsində də baş vermişdi.
29 may 1993-cü ildə Almaniyanın Solingen şəhərində irqçilər tərəfindən yandırılan evdə 5 ailə üzvü yanaraq ölmüşdü.
Bu hadisə daha sonra ölkədə türk və müsəlman icmalarının məruz qaldığı zorakılığın simvoluna çevrilir.
Mütəxəssislər Solingen qətliamından sonra türkləri hədəf alan hücumlara verilən cəzaların ağırlaşdırılmalı olduğu halda cəza tədbirlərinin artırılmaması səbəbindən bu cür hadisələrin illərdir davam etdiyini bildirirlər.
Almaniyanın Federal Ayrı-seçkiliklə Mübarizə İdarəsinin rəhbəri Ferda Ataman ötən ay verdiyi açıqlamada ölkədə müsəlmanlara qarşı ayrı-seçkiliyin artdığını və 2021-2023-cü illər arasında 20 mindən çox ayrı-seçkilik şikayəti aldıqlarını bildirib.
Almaniyada fəaliyyət göstərən İslam və Müsəlman Düşmənliyinə Qarşı Alyansın (CLAIM) hazırladığı hesabata görə, 2023-cü ildə ölkədə müsəlmanlara qarşı ümumilikdə 1926 hadisə qeydə alınıb.
Bu halların 66 faizi təhqir, təhdid və böhtan, 19 faizi ayrı-seçkilik, 15 faizi isə fiziki zorakılıq, əmlaka ziyan vurma və yandırma ilə bağlı olub. Xüsusilə qadınları hədəf alan bu hücumlar həssas təbəqələrin təhlükəsizlik məsələsini gündəmə gətirir. Eyni hesabata görə, hücumların 62 faizi müsəlman qadınları hədəf alıb.
Almaniya hökumətinin açıqladığı məlumatlara görə, 2024-cü ilin birinci yarısında sağ ekstremistlər tərəfindən törədilən cinayətlərin sayı 9 min 802 olaraq qeydə alınıb və bu rəqəm 2023-cü ilin birinci yarısındakı 6 min 992 statistikasını xeyli keçib.
Törədilən cinayətlərə propaqanda, təhdid, əmlaka ziyan vurma və adam öldürməyə cəhd və s. kimi qəsdlər daxildir.
Həmçinin məlumatda 166 nəfərin hücumlar nəticəsində yaralandığı qeyd olunub.
Mütəxəssislərin fikrincə əyalətlərin bəzi statistikaları gec təqdim etmələri səbəbindən faktiki rəqəmlər daha yüksək ola bilər.
Yeni hökumətin təqdim etdiyi məlumatlara görə, Almaniyada 2023-cü ildə müsəlmanlara qarşı 1464 cinayət aktı törədilib və bu rəqəm əvvəlki ilə nisbətən iki dəfədən çox artıb. 2024-cü ilin birinci rübündə bu cinayətlərin 53-ü fiziki zorakılıq, 9-u isə qəsdən yaralama olub.
Alman hökumətinin artan irqçi hücumlara qarşı çəkindirici tədbirlər həyata keçirməməsi, edilən hücumların daha da artacağını göstərir.
84 milyondan çox əhalisi olan və əhalisinin 5 milyonunu müsəlmanlar təşkil edən Almaniya, Qərbi Avropada ən çox müsəlman əhaliyə sahib olan ikinci ölkədir.
5 milyonluq icmaya qarşı irqçi hücumların artması ölkənin ümumi təhlükəsizliyinə ciddi təhdid yaradır.
