BAKI,AzerVoice

Livanın yeni seçilmiş prezidenti Cozef Aun bu gün, cümə axşamı – 9 yanvar 2025-ci ildə hərbi formasını çıxararaq qara rəsmi kostyumda Nümayəndələr Palatasına daxil olub. O, parlamentin sədri Nəbih Berri ilə görüşərək əl sıxıb və Konstitusiya üzrə and içib. Mərasim zalda toplaşan deputatların gurultulu alqışları ilə müşayiət olunub. Cozef Aun 1964-cü il yanvarın 10-da Livanın Matn bölgəsində anadan olub. O, ali təhsilini siyasi elmlər və hərbi elmlər sahəsində alıb, beynəlxalq münasibətlər üzrə ixtisaslaşıb. Fransız və ingilis dillərini mükəmməl bilir.

Aun hərbi karyerasına könüllü olaraq zabit kursantı kimi başlayıb. 1983-cü il mayın 19-da Hərbi Texnikuma qəbul olunub və xidmət illəri ərzində ardıcıl yüksəlişlər əldə edərək general rütbəsinədək irəliləyib. 8 mart 2017-ci ildə Livan ordusunun komandanı təyin olunub. Bu vəzifəyə gətirilməzdən əvvəl isə orduda müxtəlif mühüm postlarda xidmət edib.

General Aun hərbi xidmətlərinə görə çoxsaylı orden və medallarla təltif olunub. O, üç dəfə Müharibə medalı, iki dəfə Veteran medalı, Milli Birlik medalı, Cənub Şəfəqi medalı, Hərbi Təşəkkür medalı, Livan Fəxri medalı, Milli Sidr medalı, həmçinin Terrorla Mübarizə medalı, Hərbi Qürur medalı və birinci dərəcəli Livanın Fəxri Ordeninin sahibidir.

Aun 1988, 1995 və 2008-ci illərdə ABŞ-da müxtəlif hərbi kurslarda iştirak edib. Eyni zamanda 1996 və 2003-cü illərdə Suriyada keçirilən hərbi təlim proqramlarına qatılıb.

Şəxsi həyatına gəlincə, Cozef Aun evlidir, bir oğlu və bir qızı var. O, Livanın maroni xristian icmasına mənsubdur.