BAKU,AzerVoice Analitik Təhlil Mərkəzi

Qərbi Afrikada, Çad gölü hövzəsindən gələn məlumatlarda “Boko Haram” terror qruplaşmasının liderinin taleyi ilə bağlı ziddiyyətli xəbərlər yayılıb. Niger ordusu təşkilata qarşı hava zərbəsi zamanı qruplaşmanın rəhbəri İbrahim Məhəmmədin (“Bakoura”) öldürüldüyünü açıqlayıb. Lakin təşkilat bu iddianı təkzib edib və liderlərinin sağ olduğunu bildirib.

Niger ordusu rəsmi bəyanatında 15 avqustda həyata keçirilən əməliyyat nəticəsində “Bakoura”nın məhv edildiyini bildirdi. Ordu sözügedən əməliyyatı “dəqiq” adlandıraraq, Silla adasında üç ardıcıl hava zərbəsinin endirildiyini qeyd edib. Buna baxmayaraq, ordunun açıqlaması ilə yanaşı heç bir sübut təqdim edilməyib.

Təşkilata yaxın mənbələr isə “Bakoura”nın sağ olduğunu iddia edir. Fransız mətbuatına danışan mənbə liderlə birlikdə olduğunu deyərək Niger ordusunun açıqlamasını yalan adlandırıb. Analitiklər isə regionda daha əvvəl də bu cür yanlış məlumatların yayıldığını xatırladaraq, ehtiyatlı davranmağa çağırır.

Bakoura kimdir?

“Boko Haram” 2009-cu ildə Məhəmməd Yusuf tərəfindən yaradılıb. Onun ölümündən sonra təşkilata rəhbərliyi 2021-ci ildə öldürülən Əbubəkar Şikau üzərinə götürmüşdü. Şikaunun ölümündən sonra təşkilatın rəhbərliyində “Bakoura” önə çıxdı.

40 yaşlı Nigeriya vətəndaşı “Bakoura” xüsusən 2024-cü ilin martında 300-dən çox məktəbli qızın Kureqa məktəbindən qaçırılması, Çadda hərbi bazaya hücum və onlarla intihar hücumunun planlaşdırılması ilə bağlı günahlandırılır. O, həmçinin etnik Buduma döyüşçülərini təşkilata cəlb etməklə qruplaşmanı yenidən gücləndirməyə nail olub.

Hadisə fonunda Nigeriya ordusu da şənbə günü ölkənin şimal-şərqində 35 terrorçunun məhv edildiyini açıqlayıb. Hərbi hava qüvvələrinin nümayəndəsi İhimin Ejodami bildirib ki, zərbələr Borno əyalətində, Kamerun sərhədinə yaxın Komşi bölgəsində həyata keçirilib.

Ekspertlərə görə, “Boko Haram” liderlərinin öldürülməsi ilə bağlı xəbərlər dəfələrlə yayılsa da, bu iddiaların bir çoxu sonradan yanlış çıxıb. Şikau ilə bağlı təcrübə göstərir ki, sübut təqdim olunmayınca ehtiyatlı olmaq vacibdir. Regiondakı mürəkkəb təhlükəsizlik vəziyyəti isə Niger, Nigeriya, Çad və Kamerunun mütəmadi hədəf olduğu faktı ilə bir daha təsdiqlənir.