Türkiyənin Kahramanmaraş vilayətində zəlzələ qeydə alınıb. Türkiyə Fövqəladə Halların İdarə Olunması Agentliyinin məlumatına görə, zəlzələ Kahramanmaraşın Göksun rayonunda baş verib. Bildirilib ki, yeraltı təkanlar təxminən 7 kilometr dərinlikdə qeydə alınıb.

Türkiyə Prezidenti Rəcəb Tayyib Ərdoğan çərşənbə günü verdiyi bəyanatda Yaxın Şərqin böyük hissəsini əhatə edən müharibənin qlobal iqtisadiyyata vurduğu zərərin artdığını və bu prosesin bütün regionu alova bürümədən dayandırılmasının vacibliyini vurğulayıb. Regionun yenidən qan və barıt qoxusuna büründüyünü bildirən Ərdoğan, diplomatiyaya şans veriləcəyi təqdirdə sülhün mümkünlüyünə inandığını qeyd edib. Bu çağırış İranın xarici işlər naziri Abbas Əraqçinin Vaşinqtonla danışıqlar aparmaqdan imtina etməsi və Tehranın amerikalılarla dialoqda "çox acı təcrübəyə" malik olduğunu bildirməsindən bir gün sonraya təsadüf edir.

Almaniyanın xarici işlər naziri Yohan Vadeful sabah Türkiyəyə rəsmi səfər edərək həmkarı Hakan Fidan ilə görüşəcək. Görüşün əsas gündəmini iki ölkə arasındakı 60 milyard dollarlıq ticarət dövriyyəsi hədəfi və 18 mayda Berlində keçiriləcək "Türkiyə-Almaniya Strateji Dialoq Mexanizmi"nin üçüncü iclasına hazırlıq işləri təşkil edəcək. Nazir Fidanın müdafiə sənayesi sahəsində əməkdaşlıq və iqtisadi mexanizmlərin gücləndirilməsi məsələlərini xüsusi vurğulayacağı gözlənilir.

Türkiyənin Nəqliyyat və İnfrastruktur naziri Abdulkadir Uraloğlu regionda artan müharibə riski fonunda bağlanan hava məkanları və nəqliyyat marşrutları ilə bağlı mühüm açıqlamalar verib. Nazir bildirib ki, Suriya, İraq, İran və İsrail hava məkanlarının tamamilə qapalı olması səbəbindən hava hərəkətində ciddi risklər yaranıb. Bu vəziyyətdə həm Türkiyə, həm də xarici ölkə vətəndaşlarının təxliyəsi üçün Oman və Səudiyyə Ərəbistanı üzərindən əlavə reyslər təşkil edilib. Nazir qeyd edib ki, müvafiq ölkələrlə əldə olunan razılığa əsasən, vətəndaşlar quru yolu ilə bu ölkələrə keçərək oradan İstanbul vasitəsilə dünyaya yollanırlar və hazırda bu prosesdə heç bir ciddi axsama müşahidə olunmur.

Türkiyənin Ankara şəhərinin Haymana rayonunda 3,9 bal gücündə zəlzələ baş verib. Bu barədə Türkiyənin Fövqəladə Halların İdarəolunması Agentliyi (AFAD) X sosial media hesabında paylaşım edib. Bildirilib ki, zəlzələ yerin təxminən 8,13 kilometr dərinliyində baş verib. İlkin məlumatlara əsasən, hadisə nəticəsində can və mal itkisi barədə məlumat yoxdur.

Türkiyənin energetika və təbii sərvətlər naziri Alparslan Bayraktar Beynəlxalq Atom Enerjisi Agentliyinin rəhbəri Rafael Qrossi ilə görüş keçirib. Alparslan Bayraktar bildirib ki, Beynəlxalq Atom Enerjisi Agentliyi Türkiyənin nüvə enerjisi sahəsində inkişafında mühüm rol oynayır. Nazir həmçinin Rafael Qrossinin daha əvvəl Akkuyu Atom Elektrik Stansiyasında olduğunu xatırladıb.

Türkiyənin Dənizlinin şəhərinin Buldan rayonunda 4 bal gücündə zəlzələ baş verib. Bu barədə Türkiyənin Fövqəladə Halların İdarəolunması Agentliyi (AFAD) X sosial media hesabında paylaşım edib. Bildirilib ki, zəlzələ yerin təxminən 5,24 kilometr dərinliyində baş verib. İlkin məlumatlara əsasən, hadisə nəticəsində can və mal itkisi barədə məlumat yoxdur.

Aralıq dənizində Türkiyənin Antalya körfəzi sahillərində 4,1 bal gücündə zəlzələ qeydə alınıb. Məlumata əsasən, episentri Aralıq dənizində yerləşən zəlzələnin ocağı təxminən 40,87 kilometr dərinlikdə qeydə alınıb. Bildirilib ki, yeraltı təkanlar Antalya vilayətinin Manavqat rayonundan təxminən 18 kilometr məsafədə baş verib.

Türkiyənin xarici işlər naziri Hakan Fidan ilə İranın xarici işlər naziri Abbas Əraqçi arasında telefon danışığı baş tutub. Türkiyə Xarici İşlər Nazirliyi mənbələrindən əldə edilən məlumata görə, nazir Fidan türkiyəli həmkarına Türkiyə hava məkanının pozulmasının qəbulolunmaz olduğunu qətiyyətlə bildirib. O, Türkiyənin bu cür hallara qarşı bütün zəruri tədbirləri görməyə davam edəcəyini vurğulayıb. Nazir Fidan, həmçinin bütün tərəflərin regional təhlükəsizliyə xələl gətirə biləcək və mülki şəxslər üçün risk yaradacaq addımlardan çəkinməli olduğunu qeyd edib. Öz növbəsində İranın xarici işlər naziri Abbas Araqçı Türkiyə hava məkanına yönələn raketlərin İran mənbəli olmadığını iddia edərək, məsələ ilə bağlı genişmiqyaslı araşdırmanın aparılacağını bildirib.

Türkiyənin milli müdafiə naziri Yaşar Güler Qətər Baş nazirinin müavini və müdafiə məsələləri üzrə dövlət naziri Şeyx Suud bin Abdurrahman bin Hasan Al Sani ilə telefon danışığı aparıb.

Türkiyə Milli Müdafiə Nazirliyi (MSB), ölkənin hava sahəsinin mühafizəsinə dəstək məqsədilə ayrılmış "Patriot" hava hücumundan müdafiə sisteminin Malatya şəhərində yerləşdirildiyini elan edib. Milli Müdafiə Nazirliyindən verilən rəsmi bəyanatda bildirilir ki, Türk Silahlı Qüvvələri ölkənin və vətəndaşların təhlükəsizliyini təmin etmək məsələsində tam qərarlıdır. Bölgədə baş verən son hadisələr fonunda sərhədlərin və hava sahəsinin təhlükəsizliyi üçün zəruri tədbirlərin görüldüyü, həmçinin NATO və müttəfiqlərlə məsləhətləşmələrin aparıldığı vurğulanıb.

Türkiyənin İstanbul şəhərində terror təşkilatı İŞİD-ə qarşı genişmiqyaslı əməliyyat keçirilib. İstanbul Respublika Prokurorluğunun koordinasiyası ilə İstanbul Polis İdarəsinin Terrorla Mübarizə və Kəşfiyyat şöbələri tərəfindən terror təşkilatı İŞİD-ə qarşı əməliyyat təşkil olunub. Əməliyyat zamanı sosial şəbəkələr vasitəsilə terror təşkilatının təbliğatını aparan şəxslərə qarşı tədbirlər görülüb