BAKI,VOA Orxan Qədirzadə

Türkiyənin Ərzurum Diplomatik Araşdırmaları Mərkəzi (EDAM) tərəfindən Azərbaycanın paytaxtı Bakı şəhərində “Ortaq Mədəniyyət, Ortaq İrs” mövzusunda tədbir təşkil olunub.

VOA xəbər verir ki, tədbir Ərzurum Bələdiyyəsinin dəstəyi ilə həyata keçirilib.

Məlumata görə, EDAM Türkiyənin xaricdəki təmsil gücünü və regional dinamikləri yerində təhlil etmək məqsədilə sahə araşdırma proqramına başlayıb. Bu çərçivədə mərkəzin İdarə Heyətinin sədri Ergün Enginin rəhbərlik etdiyi nümayəndə heyəti Bakıya səfər edib.

Heyət Azərbaycan ərazisində fəaliyyət göstərən türk qurum və təşkilatlarını ziyarət edərək texniki araşdırmalar aparmağı planlaşdırır.

Səfər çərçivəsində tədbir Bakı Yunus Əmrə İnstitutunda baş tutub.

Tədbirdə EDAM rəhbərliyi ilə yanaşı, Türkiyənin Bakıdakı səfirliyinin mətbuat müşaviri Cihangir İşbilir, institutun koordinatoru Gökhan Seyhan, eləcə də akademiklər və tələbələr iştirak ediblər.

Ergün Engin çıxışında bildirib ki, səfərin əsas məqsədi regional geosiyasi proseslər, ekopolitik balans və mədəni diplomatiya istiqamətində yerində müzakirələr aparmaq və sahə məlumatları toplamaqdır.

Onun sözlərinə görə, Türkiyənin “yumşaq güc” elementlərinin fəaliyyəti təhlil ediləcək və əldə olunan nəticələr akademik və strateji tədqiqatlarda istifadə olunacaq.

Tədbir çərçivəsində Sadık Çetin “Ortaq Mədəniyyət və Ortaq İrs çərçivəsində arxivçiliyin rolu və əhəmiyyəti” mövzusunda məruzə ilə çıxış edib.

Eyni zamanda Celal İbrahimli milli şüur və milli dəyərlərin qorunmasının vacibliyini vurğulayıb.

Bununla yanaşı, EDAM koordinatorları tərəfindən müxtəlif mövzularda təqdimatlar da keçirilib.