BAKI,VOA Orxan Qədirzadə

ABŞ rəsmiləri İsrail Baş naziri Binyamin Netanyahu ilə ABŞ Prezidenti Donald Tramp arasında keçirilən görüş zamanı Türkiyənin Suriyadakı mövcudluğu ilə bağlı irəli sürülən iddialara münasibət bildirib.

ABŞ mətbuatında yayılan məlumatlara görə, Netanyahu Ağ Evdəki görüş zamanı Trampa Türkiyənin Suriyanın şimalında nəzarət etdiyi ərazilərlə bağlı xəritə təqdim edib və bu ərazilərin İsrailin işğal etdiyi bölgələrdən daha böyük olduğunu iddia edib.

İddialara əsasən, Netanyahu Suriyanın təxminən 5 faizinin Türkiyənin, 0,1 faizinin isə İsrailin nəzarətində olduğunu bildirib.

ABŞ rəsmilərindən biri isə bu müqayisənin düzgün olmadığını qeyd edib. Rəsmi bildirib ki, Türkiyənin Suriyanın şimalındakı hərbi mövcudluğu ilə İsrailin Suriyanın cənubundakı mövcudluğu arasında mühüm fərq var.

ABŞ rəsmisinin sözlərinə görə, Türkiyənin Suriyadakı fəaliyyəti hazırkı Suriya hökumətinin razılığı və dəvəti əsasında həyata keçirilir. İsrailin Suriyanın cənubundakı mövcudluğu isə fərqli hüquqi və siyasi çərçivədə qiymətləndirilir.

Məlumata görə, Tramp və Netanyahu görüşündə əsas müzakirə mövzularından biri İranla bağlı siyasət olub. ABŞ prezidentinin regional müharibənin enerji bazarlarına və qlobal iqtisadiyyata mümkün təsirlərindən narahat olduğu bildirilib.

İsrail tərəfinin isə İran üzərində təzyiqlərin artırılması və dəniz blokadasının davam etdirilməsinin vacibliyini müdafiə etdiyi qeyd olunub.

Görüş zamanı Vaşinqtonun İranla bağlı üç mümkün strategiyanı müzakirə etdiyi bildirilib. Bu variantlara diplomatik razılaşmaya nail olmaq, artan iqtisadi təzyiqlərlə yanaşı mövcud siyasəti davam etdirmək və ya yüksək intensivlikli hərbi əməliyyatlara qayıtmaq daxil edilib.

Tramp və Netanyahu arasında keçirilən görüş İranla bağlı münaqişənin başlamasından sonra liderlərin ilk üzbəüz görüşü olub.

Ekspertlərin fikrincə, Türkiyənin Suriyadakı rolu ilə bağlı müzakirələr regionda dəyişən siyasi balans və Ankara-Vaşinqton münasibətləri fonunda xüsusi əhəmiyyət daşıyır.