BAKI,VOA, Nailə Babazadə

Türkiyə Respublikası ilə Böyük Britaniya və Şimali İrlandiya Birləşmiş Krallığı arasında strateji tərəfdaşlığı möhkəmləndirməyi və yaxın dialoqla güclənən əməkdaşlığın əhatə dairəsini genişləndirməyi hədəfləyən Strateji Tərəfdaşlıq Çərçivə Sənədi imzalanıb.

VOA xəbər verir ki, Türkiyənin Xarici İşlər naziri Hakan Fidan Londona səfəri çərçivəsində britaniyalı həmkarı Yvett Kuper ilə bir araya gəlib.

İki ölkənin xarici siyasət idarələrinin rəhbərləri tərəfindən imzalanan bu sənəd tərəflər arasındakı münasibətlərin keyfiyyətcə yeni mərhələyə qədəm qoyduğunu nümayiş etdirir. Görüşdən sonra verilən məlumatlara görə tərəfdaşlıq sənədi təhlükəsizlik iqtisadiyyat texnologiya və regional məsələlərdə birgə addımların atılmasını nəzərdə tutur.

Hakan Fidan və Yvett Kuper Londonda keçirilən ikitərəfli görüş zamanı həmçinin qlobal prosesləri və transatlantik təhlükəsizlik mövzularını ətraflı müzakirə ediblər. Yeni imzalanmış çərçivə sənədinin hər iki ölkənin milli maraqlarına xidmət edəcəyi və bölgədəki sabitliyə töhfə verəcəyi vurğulanıb.