Türkiyə Prezidenti və AK Partiya sədri Rəcəb Tayyib Ərdoğan İstanbulda keçirilən ICAPP Qadın Qolunun 9-cu toplantısında çıxış edərək, qadınların ölkənin siyasi və sosial həyatındakı rolunu yüksək qiymətləndirib.

VOA xəbər verir ki, dövlət başçısı qadınların dəstəyi ilə Türkiyədə tarixi islahatların həyata keçirildiyini vurğulayıb.

Yarım əsrə yaxın siyasi fəaliyyəti dövründə qadınlarla çiyin-çiyinə çalışmaqdan qürur duyduğunu bildirən Ərdoğan, AK Partiyanın qazandığı uğurların təməlində qadın qollarının dayandığını qeyd edib. O, partiyanın 25-ci ildönümündə AK Partiya Qadın Qollarını Türkiyənin ən dinamik və ən böyük qadın hərəkatı kimi xarakterizə edib.

Prezident qadın haqları və təhlükəsizliyi sahəsində atılan hüquqi addımlara toxunaraq, 2012-ci ildə qüvvəyə minən 6284 saylı "Ailənin Qorunması və Qadına Qarşı Zorakılığın Qarşısının Alınması Haqqında Qanun"un əhəmiyyətini xatırladıb. Ərdoğan bu məsələdə dövlətin mövqeyinin "sıfır tolerans" olduğunu və nəzərdə tutulan cəzaların artırılması ilə qanunun tətbiqinin daha da gücləndirildiyini bildirib.

Çıxışının sonunda Prezident qadınların işçi qüvvəsində iştirakının və siyasətdə təmsilçilik faizinin artırılmasının ölkədə böyük dəyişikliklərə səbəb olduğunu qeyd edib. O, "Bu gün ölkəmizdə qadınlar hər sahədə daha çox iş, daha çox əmək və daha çox əlavə dəyər istehsal edirlər" deyərək qadınların ölkə iqtisadiyyatına töhfəsini ön plana çıxarıb.

Nailə Babazadə