BAKI,VOA, Nailə Babazadə

Milliyyətçi Hərəkat Partiyasının (MHP) sədri Devlet Bahçeli sosial media hesabından gündəmdəki mühüm hadisələri qiymətləndirib. Bahçeli regional və qlobal sülh üçün kritik bir mərhələdə ABŞ və İran arasında əldə olunmuş iki həftəlik müvəqqəti atəşkəs qərarını məmnuniyyətlə qarşıladıqlarını bildirib.

VOA xəbər verir ki, Bahçeli müharibənin genişlənməsinin qarşısını almağa yönəlmiş hər bir diplomatik addımın bəşəriyyətin ortaq vicdanında əks-səda doğurduğunu qeyd edib. O vurğulayıb ki, Türkiyə başda olmaqla regiondakı sağlam düşüncəli dövlətlərin konstruktiv və xəbərdarlıq xarakterli təşəbbüsləri "ağıllı diplomatiyanın" hələ də canlı olduğunu göstərir. Lakin MHP lideri Livan meydanına dair istisnaların məsələnin hələ tam həll olunmadığını ortaya qoyduğunu və sülhün qalıcı olması üçün dialoqun davam etdirilməsinin vacibliyini xatırladıb.

Devlet Bahçeli İstanbulun Levent rayonunda, "Yapı Kredi Plaza" önündəki polis nöqtəsinə edilən terror hücumuna da toxunub. O, hücumun ilkin olaraq "İsrail Baş konsulluğu hədəf alındı" şəklində təqdim edilməsinə rəğmən, konsulluğun boş olması faktının hadisənin mahiyyətinin fərqli olduğunu göstərdiyini qeyd edib. Baxçalı hücumun zamanlamasına diqqət çəkərək, Yaxın Şərq və Asiya mərkəzli şirkətlərin öz fəaliyyətlərini daha təhlükəsiz maliyyə mərkəzi olan İstanbula köçürməyə çalışdığı bir vaxtda belə bir hadisənin baş verməsinin təsadüf olmadığını bildirib.

MHP lideri terror hücumuna fədakarlıqla müdaxilə edərək daha böyük bir fəlakətin qarşısını alan qəhrəman türk polislərini canı könüldən təbrik edib. O, Türkiyənin bu cür çirkin ssenarilər və təxribatlar qarşısında sarsılmadan durmağa davam edəcəyini, yaralı təhlükəsizlik qüvvələrinə isə Allahdan şəfa dilədiyini vurğulayıb.