BAKI, VOA, Nailə Babazadə

Belçikanın müdafiə naziri Teo Franken Brüsseldə keçirilən Avropa Müdafiə Sərgisi və Konfransı (BEDEX) çərçivəsində Türkiyənin ASELSAN şirkətinin stendini ziyarət edib.

VOA xəbər verir ki, nazir Franken Türkiyənin müdafiə sənayesi sahəsindəki nailiyyətlərini yüksək qiymətləndirərək bildirib ki, Türkiyə böyük və güclü bir ölkə olmaqla yanaşı, həm də qüdrətli orduya və zəngin hərbi təcrübəyə malikdir. O, Belçikanın müəyyən imkanlara sahib olmasına baxmayaraq, Türkiyənin bu sahədəki geniş təcrübəsindən öyrənilməli olan bir çox məqamların olduğunu vurğulayıb.

Sərgidə Türkiyədən çox sayda sahibkarın və Müdafiə nazirinin müavininin iştirak etməsindən məmnunluğunu ifadə edən Franken, Yaxın Şərqdəki hadisələr səbəbindən Türkiyə üzərində böyük təzyiqin olduğunu qeyd edib. Nazir bu çətinliklərə rəğmən Türkiyənin güclü mövqeyini qorumasının və beynəlxalq müdafiə platformalarında təmsil olunmasının strateji əhəmiyyət kəsb etdiyini deyib. Franken həmçinin bildirib ki, may ayında Belçika kraliçası Matildanın rəhbərliyi ilə Ankara və İstanbula geniş tərkibli iqtisadi missiya səfər edəcək.

Belçikalı nazir Türkiyə və Belçikanın sənaye, xüsusilə müdafiə sənayesi sahəsində birgə çalışmasının zəruriliyini "əsas mesaj" kimi xarakterizə edib. ASELSAN-ın nümayiş etdirdiyi məhsullarla yaxından tanış olan Franken şirkətin stendini sərginin ən gözəl və geniş sahələrindən biri kimi dəyərləndirib. Onun sözlərinə görə, Türkiyənin hərbi sənaye kompleksinin gündəlik praktikada əldə etdiyi uğurlar Avropa ölkələri üçün mühüm tərəfdaşlıq imkanları açır və gələcək birgə layihələr üçün möhkəm zəmin yaradır.