BAKI, VOA, Nailə Babazadə

Türkiyə Prezidenti Rəcəb Tayyib Ərdoğan çərşənbə günü verdiyi bəyanatda Yaxın Şərqin böyük hissəsini əhatə edən müharibənin qlobal iqtisadiyyata vurduğu zərərin artdığını və bu prosesin bütün regionu alova bürümədən dayandırılmasının vacibliyini vurğulayıb.

VOA xəbər verir ki, regionun yenidən qan və barıt qoxusuna büründüyünü bildirən Ərdoğan, diplomatiyaya şans veriləcəyi təqdirdə sülhün mümkünlüyünə inandığını qeyd edib. Bu çağırış İranın xarici işlər naziri Abbas Əraqçinin Vaşinqtonla danışıqlar aparmaqdan imtina etməsi və Tehranın amerikalılarla dialoqda "çox acı təcrübəyə" malik olduğunu bildirməsindən bir gün sonraya təsadüf edir.

Fevralın 28-də ABŞ və İsrailin İrana qarşı zərbələri ilə başlayan müharibə artıq kütləvi ölüm, məcburi köçkünlük və genişmiqyaslı dağıntılara səbəb olmaqla yanaşı, neft bazarlarında qeyri-sabitlik yaradaraq qiymətlərin kəskin artmasına gətirib çıxarıb. Prezident Ərdoğan xəbərdarlıq edib ki, bu "mənasız, qanunsuz və nizamsız" müharibə davam edərsə, can və mal itkiləri daha da artacaq, qlobal iqtisadiyyat üçün maliyyə yükü dözülməz həddə çatacaq. Türkiyə lideri rəsmi Ankaranın diplomatik həll yolu tapmaq üçün səylərini davam etdirdiyini və gərginliyin azaldılması üçün bütün kanallardan istifadə etdiyini vurğulayıb.

Müharibənin başlanğıcından bəri Tehran Yaxın Şərq boyunca müxtəlif hədəflərə cavab zərbələri endirsə də, Türkiyənin bu prosesdən birbaşa zərər görmədiyi bildirilir. Beş gün ərzində Türkiyə hava məkanında NATO-nun müdafiə sistemləri tərəfindən iki ballistik raketin zərərsizləşdirilməsi istisna olmaqla, ölkə ərazisinə hər hansı ciddi hücum qeydə alınmayıb. Enerji və Təbii Sərvətlər naziri Alparslan Bayraktar da çərşənbə günü verdiyi açıqlamada tədarük məhdudiyyətləri ilə bağlı qlobal narahatlıqlara baxmayaraq, Türkiyənin təbii qaz və ya yanacaq təchizatı ilə bağlı heç bir problemi olmadığını və yaxın gələcəkdə belə bir sıxıntının proqnozlaşdırılmadığını təsdiqləyib.