BAKI, AzerVoice, Nailə Babazadə

Türkiyə iqtisadiyyatı 1,5 trilyon dolları keçərək tarixi rekord qırıb.

AzerVoice xəbər verir ki,bu sözləri Türkiyə Prezidenti Rəcəb Tayyib Ərdoğan Türkiyə Girişimci İş İnsanları Konfederasiyasının (TÜGİK) 7-ci Növbədənkənar Baş Assambleyasında çıxış edərək bildirib.

Ölkənin son dörddəbir əsrdə qət etdiyi iqtisadi sıçrayışdan danışıb. Dövlət başçısı Türkiyə iqtisadiyyatının 1 trilyon 538 milyard dollar səviyyəsinə yüksələrək yeni bir rekorda imza atdığını diqqətə çatdırıb. O qeyd edib ki, Türkiyə 2025-ci ilin üçüncü rübündə 3,7 faiz artım nümayiş etdirərək İƏİT (OECD) ölkələri arasında ən sürətlə böyüyən üçüncü iqtisadiyyat olmağı bacarıb.

Ərdoğan çıxışında müdafiə sənayesi və ixracat sahəsindəki tarixi uğurları rəqəmlərlə bölüşüb. 2025-ci ildə cəmi mal və xidmət ixracatının 396,5 milyard dollara çatdığını, müdafiə ixracatının isə 2002-ci ildən bəri 40 dəfə artaraq 10,5 milyard dolları keçdiyini bildirib. Prezident "Tək partiya" dövrünün çətinliklərindən sonra bu gün Türkiyənin öz texnologiyasını istehsal edən, dizayn edən və dünyaya satan bir gücə çevrildiyini vurğulayıb. O milli elektromobil "Togg"un Avropa yollarında hərəkət etməsini və türk müdafiə məhsullarının dünya miqyasında böyük rəğbət görməsini bu uğurun bariz nümunələri kimi göstərib.

Məşğulluq məsələlərinə də toxunan Ərdoğan işsizlik səviyyəsinin 31 aydır tək rəqəmli göstəricidə qaldığını qeyd edib. "Gəncliyin İstehsal Çağı" proqramı çərçivəsində 3 il ərzində 3 milyon gəncin iş həyatına birbaşa daxil ediləcəyini vəd edən Prezident inflyasiya ilə mübarizədə də qərarlı olduqlarını bildirib. O iş dünyasını bölgədəki və dünyadakı böhranlara baxmayaraq ümidsizliyə qapılmamağa çağırıb və Türkiyənin yenidən formalaşan dünya nizamında mühüm qütblərdən biri olacağını bəyan edib.