BAKI, AzerVoice, Orxan Qədirzadə

Türkiyə Prezidenti Rəcəb Tayyib Ərdoğan Macarıstanın Baş naziri Viktor Orbanla İstanbulda keçirilən görüşdən sonra iki ölkə arasında əlaqələrin bütün sahələrdə genişləndirilməsi barədə mesaj verib. Liderlər ticarət həcminin 10 milyard dollara çatdırılması barədə razılığa gəlib və 16 yeni əməkdaşlıq sənədi imzalanıb.

AzerVoice xəbər verir ki, bu barədə Türkiyə Prezident Administrasiyası məlumat yayıb.

Prezident Ərdoğan bildirib ki, Ankara-Budapeşt münasibətləri təkcə ikitərəfli çərçivədə yox, geniş regionda strateji sabitliyə töhfə verir.
O, Macarıstanın Türk Dövlətləri Təşkilatına verdiyi dəstəyə görə təşəkkür edib və Avropa İttifaqında üzvlük prosesində Budapeştin mövqeyini yüksək qiymətləndirib.

Liderlər mövcud iqtisadi dinamikanı nəzərə alaraq ticarət dövriyyəsinin 6 milyard dollardan 10 milyard dollara yüksəldilməsi barədə razılaşıb. Ərdoğan bildirib ki, mexanizmlər bu hədəfi qısa müddətdə əldə etməyə imkan verəcək.

Görüş zamanı iki ölkə arasında müxtəlif sahələri əhatə edən 16 müqavilə imzalanıb.
Sənədlər hərbi hava qüvvələrindən müdafiə sənayesinə, mədəniyyətdən təhsilə, dezinformasiya ilə mübarizədən yüksək texnologiyaya qədər geniş spektri əhatə edir.

Xüsusilə Dezinformasiyaya Qarşı Birgə Mübarizə memorandumunun imzalanması rəqəmsal təhlükəsizlik sahəsində əməkdaşlığın yeni mərhələyə keçdiyini göstərir.

Macarıstan Baş naziri Viktor Orban Azərbaycanın və Türkiyənin də daxil olduğu Türk dünyası ilə əlaqələrin Budapeşt üçün xüsusi əhəmiyyət daşıdığını bildirib.
O, Prezident Ərdoğanın Rusiya–Ukrayna münaqişəsində yeganə səmərəli vasitəçi olduğunu vurğulayaraq “Tanrı Türkiyəni qorusun” sözlərini deyib.

Görüşdə Orta Şərq, Ukrayna və Avropa təhlükəsizlik arxitekturası daxil olmaqla regional proseslər də dəyərləndirilib. Tərəflər əməkdaşlığın həm regional sabitlik, həm də qlobal səviyyədə yeni imkanlar açdığını bildiriblər.