BAKI,VOA Orxan Qədirzadə

İsrailin xarici işlər naziri Gideon Saar bildirib ki, hökumətin növbəti iclasına 1915-ci il hadisələrinin "erməni soyqırımı" kimi rəsmi tanınmasını nəzərdə tutan qərar layihəsi təqdim edəcək.

Nazir bu addımı "mənəvi və tarixi öhdəlik" adlandırıb.

Saarın açıqlamasına əsasən, hökumət qərar layihəsini təsdiqləyəcəyi təqdirdə sənəd daha sonra İsrail parlamenti – Knessetin müzakirəsinə və səsverməsinə təqdim olunacaq.

Qeyd edək ki, İsrailin bu məsələ ilə bağlı rəsmi dövlət mövqeyi uzun illər ərzində müxtəlif siyasi və diplomatik amillər səbəbindən dəyişkən olub. Xarici işlər nazirinin açıqlaması hələlik hökumətin yekun qərarı deyil və qərar layihəsinin qüvvəyə minməsi üçün əvvəlcə hökumətin, daha sonra isə qanunvericilik prosedurlarının tamamlanması tələb olunur.

Türkiyə isə 1915-ci il hadisələrinin "soyqırımı" kimi qiymətləndirilməsini rədd edir. Ankara həmin dövrdə həm ermənilərin, həm də müsəlman əhalinin həyatını itirdiyini bildirir, hadisələrin beynəlxalq hüquq baxımından "soyqırımı" kimi xarakterizə olunmasına qarşı çıxır və məsələnin tarixçilər tərəfindən araşdırılmasının vacibliyini vurğulayır.