BAKI, AzerVoice, Nailə Babazadə
Türkiyənin xarici işlər naziri Hakan Fidan bildirib ki, İsrailin Qəzzada törətdiyi insanlıq əleyhinə cinayətlərin açıq şəkildə tanınması və ifşa edilməsi “ədalətli dünya üçün atılacaq ilk addımdır”.
AzerVoice xəbər verir ki, Fidan bu fikirləri cümə günü İtaliyanın paytaxtı Romada yerləşən Beynəlxalq Münasibətlər İnstitutunda keçirilən konfransda səsləndirib. O vurğulayıb ki, Qəzza məsələsi BMT Baş Assambleyasının gündəliyində olacaq və “bu mövzu beynəlxalq ictimaiyyət üçün doğru ilə yanlışı ayırd etmə testidir”.
“Artıq yalandan çəkinməyə ehtiyac yoxdur, İsrail Qəzzada soyqırımı törədir. İtaliyanın açıq dəstəyi bu mərhələdə hər zamankından daha önəmlidir”, – deyə Fidan qeyd edib.
Nazir əlavə edib ki, İsrailin uzunmüddətli məqsədinin yeni torpaqlar əldə etmək olduğunu gizlətmədiyi aydındır. Onun sözlərinə görə, hətta ABŞ belə İsrailin siyasətləri fonunda bölgənin təhlükəsizliyini təmin edə bilmir və bu, xüsusilə Körfəz ölkələrində ciddi narahatlıq doğurur.
Fidan İsrailin Suriyadakı planlarına da diqqət çəkərək bildirib ki, Təl-Əviv qonşularını parçalanmış, zəif və qeyri-sabit görmək istəyir, onların iqtisadi və siyasi baxımdan güclənməsini isə arzulamır.
“İsrailin gələcək siyasi liderləri anlamalıdırlar ki, bölgədəki gələcək yalnız qarşılıqlı rifah, şərəf və ortaq təhlükəsizlik üzərində qurula bilər. Başqalarının qeyri-sabitliyi və təhlükəsizliyi sizin rifahınız ola bilməz. Bu yanlış düsturu dəyişməliyik”, – deyə Türkiyənin xarici işlər naziri bildirib.
Fidan həmçinin qeyd edib ki, Avropanın üzləşdiyi geosiyasi fırtınaları yalnız Türkiyənin Avropa İttifaqı masasında iştirakı ilə aradan qaldırmaq mümkündür.
Məlumata görə, 7 oktyabr 2023-cü ildən bəri ABŞ dəstəyi ilə İsrailin Qəzzaya qarşı həyata keçirdiyi hücumlar nəticəsində 64 min 756 fələstinli həyatını itirib, 164 min 59 nəfər yaralanıb. Həlak olanların əksəriyyətini qadınlar və uşaqlar təşkil edir. Bundan əlavə, yüz minlərlə insan evlərini tərk etməyə məcbur olub, aclıq səbəbindən isə 413 nəfər, o cümlədən 143 uşaq həyatını itirib.