BAKI, AzerVoice, Fərid Mikayılov

Türkiyənin İstanbul şəhərində polis tərəfindən keçirilən əməliyyatlar nəticəsində 24 nəfər saxlanılıb, onlardan 11-i məhkəmə qərarı ilə həbs edilib.

AzerVoice-un məlumatına görə, araşdırmalar çərçivəsində 15-26 avqust tarixlərində şəhərin müxtəlif rayonlarında cinayətkar qruplara qarşı əməliyyatlar təşkil olunub.

Polis qrupları Bağcılar, Arnavutköy, Büyükçekmece, Esenyurt, Üsküdar və Eyüpsultan rayonlarında keçirdikləri əməliyyatlarla ümumilikdə 24 nəfəri saxlayıb.

İstintaq zamanı şübhəlilərin iş yerlərinə silahlı hücum, təhdid, yağma, qəsdən yaralama, qanunsuz silah istehsalı və qaçaqmalçılıq kimi cinayətlərdə iştirak etdiyi müəyyən edilib. Bundan əlavə, saxlanılanlardan bir neçəsinin Ataşehir rayonunda bir gözəllik mərkəzinə qarşı hücum planlaşdırdığı da məlum olub.

Ünvanlarda aparılan axtarışlar nəticəsində:

• 96 ədəd qanunsuz tapança,
• bir neçə ov tüfəngi,
• 689 tapança mexanizmi,
• oğurluq motosiklet,
• 42 güllə,
• silah montajında istifadə olunan pres və daşlama cihazları aşkarlanıb.

Saxlanılanlardan 18-i məhkəməyə göndərilib. Onlardan 11 nəfəri həbs edilib, 5 nəfər barəsində məhkəmənin nəzarət tədbiri seçilib, 2 nəfər isə sərbəst buraxılıb. Digər 6 şübhəlinin istintaqı isə davam etdirilir.