BAKI, AzerVoice, Səməd Əyyubov

Türkiyə Prezidenti Rəcəb Tayyib Ərdoğan Ukrayna Prezidenti Volodimir Zelenski ilə telefon danışığı aparıb.

AzerVoice xəbər verir ki, bu barədə Türkiyə Prezident Administrasiyasının Kommunikasiya İdarəsi məlumat yayıb.

Məlumata görə, söhbət zamanı Türkiyə ilə Ukrayna arasındakı ikitərəfli münasibətlər, o cümlədən regional və qlobal məsələlər müzakirə olunub.

Ərdoğan, İstanbulda keçirilən Ukrayna–Rusiya danışıqlarında əldə olunan irəliləyişi qiymətli hesab etdiklərini, növbəti mərhələlərdə atəşkəsə dair əhəmiyyətli nəticələrin əldə olunmasının daimi sülh yolunda mühüm olacağına ümid etdiyini bildirib.

O, Türkiyənin liderlər səviyyəsində görüşə ev sahibliyi etməyə hazır olduğunu, hərbi, humanitar və siyasi sahələrdə işçi qruplarının yaradılmasının bu sammitə gedən yolu aça biləcəyinə inandıqlarını bildirib. Ərdoğan, Türkiyənin Ukraynanın suverenliyi və ərazi bütövlüyünə dəstəyini davam etdirəcəyini vurğulayıb.

Qeyd edək ki, Rusiya və Ukrayna nümayəndə heyətləri arasında danışıqların 2-ci turu iyunun 2-də İstanbulda baş tutub. Danışıqlar nəticəsində tərəflər hər tərəfdən 6 min hərbçinin meyitinin qarşı tərəfə təhvil verilməsi ilə bağlı razılığa gəlmişdi.

İyulun 23-də isə, danışıqların üçüncü raundunda heyətlər arasında danışıqlar təxminən 40 dəqiqə davam edib. Bu müddətdə hər iki tərəf təqdim olunan memorandum layihələrindəki mövqeləri müzakirə edib.

Görüş nəticəsində yalnız hərbi əsirlərin deyil, mülki şəxslərin də dəyişdirilməsi barədə razılıq əldə olunub. Həmçinin, Moskva Ukraynaya daha 3 000 ukraynalı hərbçinin cəsədini təhvil verməyə və cəbhə xəttində yaralı və həlak olanların toplanması üçün qısa müddətli humanitar fasilələrin bərpasına çağırıb.

Medinski bildirib ki, danışıqların dördüncü raunduna dair qərar, əldə olunmuş yeni razılaşmaların yerinə yetirilməsindən sonra veriləcək.