BAKI, Azervoice , Nərmin Ağayeva

Türkiyənin KAAN döyüş təyyarəsi ABŞ istehsalı F-35 ilə rəqabətə hazırlaşır.

Azervoice xəbər verir ki, ABŞ-ın nüfuzlu nəşri Newsweek, Türkiyənin yerli istehsal KAAN döyüş təyyarəsinin Cənub yarımkürəsində F-35-lə silah bazarında rəqabət aparmaq potensialına malik olduğunu yazıb.

Nəşr bildirib ki, Türkiyə KAAN-ı daha əlçatan bir alternativ kimi mövqeləndirir və bu, xüsusilə inkişaf etməkdə olan iqtisadiyyatların diqqətini cəlb edir.

İyul ayında Türkiyə İndoneziya ilə 48 ədəd KAAN təyyarəsinin tədarükü üçün ilk ixrac müqaviləsini imzalayıb. Newsweek-in məlumatına görə, bu addım Türkiyənin beşinci nəsil gizli döyüş təyyarəsi layihəsinin beynəlxalq bazarda maraq yaratdığını göstərir.

Newsweek qeyd edir ki, KAAN TUSAŞ tərəfindən Türkiyənin köhnəlmiş F-16 donanmasını əvəz etmək üçün hazırlanıb. Təyyarə həmçinin qonşu ölkələrə F-35-dən daha sərfəli alternativ kimi təklif olunur. TUSAŞ rəsmiləri KAAN-ın F-35-dən qiymət baxımından daha əlverişli olacağını vurğulayıb.

Qeyd edək ki, Türkiyənin 2019-cu ildə Rusiyadan S-400 hava hücumundan müdafiə sistemi alması səbəbilə F-35 proqramından çıxarılması strateji muxtariyyətə keçid kimi qiymətləndirilir. Türkiyə F-35 proqramında iştirak etdiyi dövrdə 900-dən çox F-35 komponenti istehsal edərək bu sahədə mühüm təcrübə toplayıb.

2024-cü ildə KAAN-ın ilk sınaq uçuşundan sonra layihəyə maraq daha da artıb. Misirin də bu proqrama qoşula biləcəyi barədə məlumatlar yayılsa da, rəsmi təsdiq yoxdur. Körfəz ölkələrinin də KAAN-a maraq göstərdiyi bildirilir, lakin Vaşinqton İsrailin hərbi üstünlüyünü qorumaq məqsədilə bölgəyə qabaqcıl sistemlərin satışında ehtiyatlı davranır.

Buna baxmayaraq, prezident Rəcəb Tayyib Ərdoğan Türkiyə Hərbi Hava Qüvvələri üçün F-35-lərin alınmasında maraqlı olduğunu bildirib və ABŞ prezidenti Donald Trampla danışıqlarda irəliləyiş əldə olunduğunu açıqlayıb.