BAKI, AzerVoice

Türkiyə və İraq arasında boru kəmərinin gücündən tam istifadə edilməsi və cənuba qədər genişləndirilməsi üçün yeni neft sazişi hazırlanır.

AzerVoice xəbər verir ki, Türkiyənin Enerji və Təbii Sərvətlər naziri Alparslan Bayraktar İraqla yeni neft müqaviləsi layihəsi üzrə işlərin davam etdiyini açıqlayıb.

O, layihə mətninin artıq İraq rəsmilərinə göndərildiyini bildirib və boru xəttinin İraqın cənubuna qədər uzadılmasının gündəmdə olduğunu vurğulayıb.

Nazir Bayraktar bildirib ki, gündəlik 1,5 milyon barel ötürmə gücünə malik olan kəmər uzun müddətdir tam gücü ilə fəaliyyət göstərmir və hal-hazırda neft axını yoxdur.

Bayraktar qeyd edib ki, müqavilənin 2026-cı ilin iyul ayına qədər imzalanması nəzərdə tutulur.

O, boru xəttinin yalnız şimal bölgələrdən deyil, İraqın cənub bölgələrindən də neft daşıya bilməsi üçün texniki variantların layihəyə daxil edildiyini əlavə edib. Nazir bu təşəbbüsün İraq üçün də ixrac marşrutlarının şaxələndirilməsi baxımından əhəmiyyətli olduğunu vurğulayıb.

Nazir Bayraktar ölkədə müşahidə olunan meşə yanğınlarının bəzi enerji obyektlərinə yaxınlaşdığına toxunaraq bildirib ki, ehtiyat tədbiri olaraq bəzi istilik elektrik stansiyalarının fəaliyyəti dayandırılıb.

Qeyd edək ki, Nazir Bayraktar həmçinin ABŞ-ın Ankaradakı səfiri Tom Barak ilə görüşündə gündəmə gələn enerji məsələlərinə də aydınlıq gətirib. O, tərəflər arasında neft və təbii qaz sahəsində əməkdaşlıqla yanaşı, kiçik modul nüvə reaktorları üzrə ortaq layihələrin də müzakirə olunduğunu bildirib.

Bayraktar ABŞ ilə mayeləşdirilmiş təbii qaz (LNG) təchizatı üzrə yeni bir müqavilənin gündəmdə ola biləcəyini də əlavə edib.