BAKI, AzerVoice

Türkiyə 15 iyul 2016-cı il tarixində FETÖ terror təşkilatı tərəfindən həyata keçirilən hərbi çevriliş cəhdinin 9-cu ildönümünü qeyd etməyə hazırlaşır.

AzerVoice xəbər verir ki, bu ilki anım mərasimləri “Zəfərin Adı: Türkiyə” devizi altında təşkil olunacaq.

Çevriliş cəhdi zamanı ABŞ-da yaşayan Fəthullah Gülənin rəhbərlik etdiyi FETÖ üzvləri tərəfindən Ankara, İstanbul və digər şəhərlərdə yerləşən strateji obyektlər hədəf alınıb, nəticədə 250-dən çox insan həyatını itirmiş, 2 min 200-dən çox şəxs isə yaralanıb.

Hadisədən sonra FETÖ-nün dövlətin əsas strukturlarına — xüsusilə də silahlı qüvvələrə uzun illər ərzində gizli şəkildə sızdığı aşkar edilib və təşkilatla əlaqəsi olan minlərlə şəxs dövlət vəzifələrindən uzaqlaşdırılıb. Hüquqi araşdırmalar bu gün də davam edir.

Türkiyə Böyük Millət Məclisi çevriliş cəhdinin ertəsi günü 15 iyul tarixini “Demokratiya və Milli Birlik Günü” kimi təsis etmiş və bu gün hər il ölkə üzrə anım tədbirləri ilə qeyd olunur.

Rəcəb Tayyib Ərdoğanın bu ilki mərasimlər çərçivəsində TBMM-də xüsusi iclasda çıxış edəcəyi, həmçinin çevriliş gecəsində 44 şəhidin verildiyi Ankara Polis Xüsusi Təyinatlı Qüvvələri Komandanlığını ziyarət edəcəyi gözlənilir.

Anım həftəsi çərçivəsində 14–18 iyul tarixlərində Ankara və İstanbulda yerli və beynəlxalq jurnalistlərin iştirakı ilə media proqramı keçiriləcək. Proqrama 81 şəhərdən 81 yerli jurnalist və 41 ölkədən 120 xarici media nümayəndəsi qatılacaq.

Tədbirlər zamanı iştirakçılar Ankara Prezident Kompleksi, 15 İyul Demokratiya Muzeyi və parlament binasını, İstanbulda isə 15 İyul Xatirə Muzeyi və İstanbul Valiliyini ziyarət edəcəklər. Eyni zamanda çevriliş gecəsinə dair təqdimatlar və brifinqlər təşkil olunacaq.

Proqram həmçinin beynəlxalq iştirakçılara Türkiyənin FETÖ-yə qarşı apardığı mübarizə barədə ətraflı məlumat verməyi və 2016-cı ilin iyulunda şəhid olan vətəndaşların xatirəsini yad etməyi hədəfləyir.