BAKI,AzerVoice

Somali sahillərində 20 milyard barel neft aşkarlanıb – Türkiyə 30 faiz pay alacaq.

AzerVoice xəbər verir ki, “Oruç Rəis” tədqiqat gəmisi Somali sahillərində apardığı kəşfiyyat işləri nəticəsində 20 milyard barel həcmində neft ehtiyatı aşkarlayıb.

Aşkar edilən neftdən əldə olunacaq gəlirin 30 faizi Türkiyəyə çatacaq.

Somali mətbuatının yaydığı məlumata görə, neft ehtiyatları üç ayrı kəşfiyyat blokuna yayılıb. Hər bir blokda təxminən 10 milyard barel neft ehtiyatı olduğu bildirilir. Hal-hazırda üçüncü blokda aktiv tədqiqat işləri davam edir və nəticələrin avqust ayına qədər açıqlanacağı gözlənilir.

Qeyd edək ki, Türkiyə və Somali arasında əldə edilən razılaşmaya əsasən, aşkar edilən neft gəlirlərinin 30 faizi Türkiyəyə məxsus olacaq. Türkiyə Enerji və Təbii Sərvətlər naziri Alparslan Bayraktar “Somalinin quru ərazilərində də neft və qaz kəşfiyyatı işləri aparacağıq” deyə bildirib.

“Oruç Rəis” tədqiqat gəmisi ilk qitələrarası missiyası çərçivəsində 5 oktyabrda prezident Rəcəb Tayyib Ərdoğanın iştirakı ilə Dolmabahçedən yola salınıb. Gəmi Aralıq dənizi, Süveyş kanalı və Qırmızı dəniz marşrutu üzrə hərəkət edərək 3 həftə sonra Moqadişu Limanına çatıb. Gəmiyə “Zağanos Paşa”, “Sancar” və “Ataman” dəstək gəmiləri də müşayiət edib.