BAKI, AzerVoice

ASELSAN 2025-ci ilin birinci rübündə rekord maliyyə göstəricilərinə imza atıb

AzerVoice xəbər verir ki, Türkiyənin müdafiə sənayesi nəhəngi ASELSAN 2025-ci ilin birinci rübü üzrə maliyyə nəticələrini açıqlayıb.

Şirkət bu dövrdə gəlirini 9% artıraraq 22,8 milyard TL-yə çatdırıb və ixrac yönümlü fəaliyyətlərini genişləndirməkdə davam edib.

ASELSAN-ın yeni müqavilə portfeli ötən ilin eyni dövrü ilə müqayisədə 46% artaraq 1,5 milyard ABŞ dollarına, ixrac müqavilələri isə 220% artaraq 372 milyon dollara yüksəlib. Sifarişlərin ümumi həcmi 15 milyard ABŞ dolları təşkil edib ki, bu da 35%-lik artıma bərabərdir.

Şirkətin əməliyyat mənfəəti (EBITDA) əvvəlki ilə nisbətən 10% artaraq 5,1 milyard TL olub, bu isə şirkətin əsas fəaliyyətlərindən əldə etdiyi qazancın artdığını göstərir. EBITDA marjası 23% təşkil edib, yəni ümumi gəlirin təxminən dörddə biri xalis əməliyyat mənfəəti kimi qalıb. Net borc/EBITDA nisbətinin 1,07-dən 0,60-a düşməsi isə ASELSAN-ın borc yükünü azaltdığını və maliyyə baxımından daha dayanıqlı vəziyyətə gəldiyini göstərir.

ASELSAN hesabat dövründə Ar-Ge xərclərini 33% artıraraq 250 milyon dollara, investisiya xərclərini isə 70% artırıb. Maliyyə borcu 8%, kommersiya borcu isə 37% azalıb, bu da şirkətin pul axınında əhəmiyyətli yaxşılaşma olduğunu göstərir.

Şirkətin gəlirində Hava Hücumundan Müdafiə Sistemləri, Silah Sistemləri, Radar, Elektron Müharibə, Elektro-Optika, Dəniz Sistemləri və Hərbi Rabitə Sistemlərinin tədarükləri mühüm rol oynayıb.

Qeyd edək ki, ASELSAN-ın baş direktoru Ahmet Akyol bu nəticələri “2024-cü ildə əldə olunan güclü inkişafın davamı” kimi qiymətləndirib. O bildirib ki, şirkət 2024-cü ili BIST-100-də altıncı ən dəyərli şirkət kimi başa vurub və hazırda Borsa İstanbul-un ən dəyərli şirkəti mövqeyindədir.

Akyol ASELSAN-ın texnoloji uğurlarını da vurğulayıb. O, HİSAR O Hava Hücumundan Müdafiə Sistemi, PUHU 3-LT Elektron Dəstək Sistemləri, modernləşdirilmiş ZMA-lar, GÖZDE Rəhbər Kitləri, ANTIDOT 2-U/S Podları, GÖKTAN və GÖKSUR sistemləri kimi məhsulların ilk rübdə istifadəyə verildiyini açıqlayıb.

İlin ilk rübündə imzalanan əsas müqavilələr sırasında beynəlxalq hərbi rabitə, radar, hava hücumundan müdafiə və elektron müharibə sistemləri ilə bağlı ixrac müqavilələri, Müdafiə Sənayesi Rəhbərliyi ilə radar və təhlükəsizlik sistemlərinin satın alınması müqavilələri və TÜRASAŞ ilə dəmir yolu siqnalizasiya layihəsi də yer alır.