Bakı. AzerVoice:
Özbəkistan prezidenti Şavkat Mirziyoyevin sabah Türkiyəyə rəsmi səfəri gözlənilir.
AzerVoice xəbər verir ki, sabah prezident Mirziyoyevin Ankaraya səfəri zamanı Özbəkistan-Türkiyə Yüksək Səviyyəli Strateji Əməkdaşlıq Şurasının üçüncü iclasının keçiriləcəyi gözlənilir.
Mirziyoyevin səfəri çərçivəsində imzalanacaq ikitərəfli sazişlərlə ölkələr arasında yüksək səviyyəli strateji tərəfdaşlıq əlaqələrinin daha da möhkəmlənəcəyi ümid edilir.
Qeyd edək ki, iki ölkə arasında təhsil, səhiyyə və mədəniyyət sahələrində əlaqələr sürətlə inkişaf etməkdə davam edir. Bu çərçivədə ötən il iki ölkə arasında səhiyyə və təhsil forumları keçirilib. Qarşılıqlı əlaqələrin inkişafı ilə iki ölkə arasında uçuş marşurutlarının sayı artıb.İstanbul-Daşkənd reysləri ilə yanaşı, Türkiyənin Ankara və İzmir şəhərləri ilə Özbəkistanın Səmərqənd, Buxara, Ürganç, Fərqanə və Namanqan şəhərlərini birləşdirən reyslər başlayıb.