BAKI,AzerVoice

2025-ci il martın 13-də Bişkekdə Qırğızıstan və Tacikistan prezidentləri tərəfindən Dövlət Sərhədi Haqqında Razılaşmanın imzalanması Türk Dövlətləri Təşkilatının (TDT) baş katibi Kubanıçbek Ömürəliyev tərəfindən müsbət qarşılanıb.

AzerVoice xəbər verir ki, Ömürəliyevin fikrincə, diplomatiya və dialoq yolu ilə əldə edilən bu mühüm addım Mərkəzi Asiya və onun ətrafında sabit sülhə, sabitliyə və rifaha yol açacaq.

"Biz qardaşlıq əlaqələrinin və regional həmrəyliyin möhkəmləndirilməsinə yönəlmiş bütün səyləri dəstəkləməyə hazırıq", – deyə o əlavə edib.

Qeyd edək ki, Qırğızıstan və Tacikistan arasında 1991-ci ildən bəri davam edən sərhəd mübahisəsi rəsmi olaraq həll edilib.

Prezidentlər Sadır Japarov və Emoməli Rəhmanov “Qırğız Respublikası ilə Tacikistan Respublikası arasında Qırğızıstan-Tacikistan dövlət sərhədi haqqında Saziş”i imzalayıblar.

Bu müqavilə iki ölkə arasında illərlə davam edən mübahisələri rəsmi şəkildə həll edib. Saziş çərçivəsində Kızıl-Bel və Kayrağaç avtomobil yollarında keçid məntəqələri videokonfrans vasitəsilə istifadəyə verilib.

Həmçinin, Düşənbə-Bişkek-Düşənbə hava reyslərinin martın 14-dən fəaliyyətə başlayacağını elan edən Rəhman, eyni zamanda terror, ekstremizm, radikalizm, beynəlxalq cinayət təşkilatları, kibercinayətlər və narkotik qaçaqmalçılığına qarşı birgə mübarizə aparmaq barədə razılıq əldə olunduğunu qeyd edib.