BAKI,VOA

Yevlax Pilot Aqroparkında fəaliyyət göstərən "İsfa" MMC istehsal etdiyi məhsulları yalnız daxili bazara deyil, eyni zamanda Rusiya, Qırğızıstan və Birləşmiş Ərəb Əmirliklərinə ixrac edir. Şirkət bu fəaliyyətin "Made in Azerbaijan" brendinin beynəlxalq bazarlarda tanınmasına və ölkəyə valyuta daxilolmalarının artmasına töhfə verdiyini bildirir.

VOA xəbər verir ki, bu barədə "İsfa" MMC-nin direktoru Samir Xeyirbəyov məlumat verib. Onun sözlərinə görə, şirkət Yevlax Pilot Aqroparkında fəaliyyət göstərən müəssisələr arasında məhsullarını xarici bazarlara ixrac edən aparıcı şirkətlərdən biridir.

Samir Xeyirbəyov bildirib ki, məhsulların Rusiya, Qırğızıstan və Birləşmiş Ərəb Əmirlikləri bazarlarına çıxarılması Azərbaycan mənşəli məhsulların xaricdə tanınmasına və ölkənin ixrac potensialının genişlənməsinə xidmət edir.

Şirkət rəhbəri qeyd edib ki, "İsfa" MMC məşğulluğun artırılmasına da mühüm töhfə verir. Onun sözlərinə görə, mövsüm dövründə müəssisədə təxminən 3 min nəfər çalışır.

Direktor əlavə edib ki, şirkət gələcəkdə də istehsal və ixrac imkanlarını genişləndirməyi, həmçinin yeni iş yerlərinin yaradılmasını davam etdirməyi planlaşdırır.