İran hazırda eyni anda dörd istiqamətdə mübarizə aparır. Bunu İran parlamentinin sədri Məhəmməd Baqir Qalibaf deyib. O bildirib ki, bu qarşıdurmalardan biri İsrail və ABŞ ilə əlaqədardır. Spikerin sözlərinə görə, paralel olaraq iqtisadi, kognitiv-psixoloji, eləcə də hərbi-terror xarakterli müharibələr davam edir.

İran parlamentinin sədri Məhəmməd Baqir Qalibaf bildirib ki, Pakistanla sərhəd ticarətinin və iqtisadi əməkdaşlığın genişləndirilməsi hər iki ölkədə təhlükəsizliyi gücləndirəcək və iqtisadi artıma töhfə verəcək. Cümə günü Pakistana üçgünlük səfərdən qayıtdıqdan sonra danışan Qalibaf açıqlamalar verib. “Əgər sərhəd bazarları inkişaf etdirilsə və Pakistanla ticarət canlansa, iki ölkə arasında mövcud olan təhlükəsizlik və sərhəd problemlərinin böyük bir hissəsi aradan qalxacaq. Çünki sərhədlər qanuni və genişmiqyaslı iqtisadi fəaliyyət mərkəzinə çevrildikdə qaçaqmalçılıq və təhlükəsizlik problemləri minimuma enir.” - deyə Qalibaf qeyd edib.

İranın Ali Milli Təhlükəsizlik Şurasının katibi Əli Lariçani ölkədə dərinləşən siyasi qarşıdurmalar barədə ciddi xəbərdarlıq edib. Cümə günü humanitar elmlər üzrə mütəxəssislərlə görüşdə çıxış edən Lariçani bildirib ki, bəzi siyasi fiqurlar “hazırkı mərhələnin həssaslığını və təhlükəsini” hələ tam anlamayıb və daxili çəkişmələri “əsassız rahatlıqla” davam etdirirlər.

Qalibaf sosial şəbəkədə paylaşdığı açıqlamada Avropa ölkələrinin “snapback mexanizmini” işə salaraq BMT Təhlükəsizlik Şurasının (TŞ) ləğv olunmuş qətnamələrini bərpa etmək cəhdinə münasibət bildirib və bu addımı “qanunsuz” adlandırıb.