BAKI,VOA Orxan Qədirzadə

İsrailin Prezident Əhməd əş-Şəraanın rəhbərlik etdiyi Suriya hökumətinin ölkənin hərbi hava qüvvələrini yenidən qurmaq səylərini narahatlıqla izlədiyi bildirilir. İsrail kəşfiyyatının hazırladığı hesabatlarda Dəməşq rəhbərliyinin hava qüvvələrinin imkanlarını artırmaq üçün sistemli fəaliyyət həyata keçirdiyi qeyd olunub.

İsrail dövlət televiziyası KAN-ın məlumatına görə, Suriya yeni pilotlar cəlb edir, intensiv təlim uçuşları həyata keçirir və ölkənin şimalında döyüş təyyarələrinin də iştirak etdiyi genişmiqyaslı ilk hərbi təlimini keçirib.

İsrail kəşfiyyatının qiymətləndirməsinə əsasən, Suriya hərbi hava qüvvələrinin yenidən qurulmasına yönəlmiş bu fəaliyyətlər ölkənin təhlükəsizlik dairələrində narahatlıq doğurur.

Türkiyənin Suriyadakı təsiri İsraili düşündürür

İsrailin narahatlığı yalnız Suriyanın hava qüvvələrinin bərpası ilə məhdudlaşmır.

KAN-ın məlumatında Türkiyənin Suriyada artan təsirinin də İsrail üçün əsas narahatlıq mənbələrindən biri olduğu vurğulanıb.

İsrailli təhlükəsizlik ekspertləri Türkiyənin Suriyanın şimalındakı hərbi mövcudluğunun İsrailin Suriya ərazisinə qarşı həyata keçirdiyi hava əməliyyatlarını çətinləşdirə biləcəyini bildiriblər.

Ekspertlərin fikrincə, Türkiyənin bölgədəki hərbi və siyasi təsirinin güclənməsi İsrailin Suriyadakı hərbi fəaliyyətlərinin planlaşdırılmasına əlavə amil kimi daxil olur.

Suriya hərbi təlimlərini genişləndirir

Suriya ordusuna məxsus döyüş təyyarələri ötən gün ölkənin şimalındakı İdlib şəhəri üzərində təlim uçuşları həyata keçirib.

Bu hadisə Dəməşqin uzun müddətdən sonra hərbi hava qüvvələrinin imkanlarını bərpa etməyə çalışdığını göstərən addımlardan biri kimi qiymətləndirilir.

İsrail Bəşşar Əsəd rejiminin 2024-cü ilin dekabrında hakimiyyətdən göndərilməsindən sonra Suriya ərazisindəki hərbi obyektlərə çoxsaylı hava zərbələri endirib.

İsrail ordusunun həmin əməliyyatlar zamanı Suriyaya məxsus hərbi bazaları, hava hücumundan müdafiə sistemlərini, silah istehsalı müəssisələrini və silah anbarlarını hədəfə aldığı bildirilmişdi.

Dəməşqin hərbi hava qüvvələrini yenidən formalaşdırmaq cəhdləri və Türkiyənin Suriyanın şimalında artan hərbi mövcudluğu fonunda İsrailin bölgədəki hesablamalarının mürəkkəbləşdiyi qeyd olunur.